უკრაინის პრეზიდენტის, ვოლოდიმირ ზელენსკის განცხადებით, ეს ღამე უკრაინელებისთვის ძალიან რთული იქნება, რადგან რუსეთი გამოიყენებს მის ხელთ არსებულ ყველა ძალას, რომ გატეხოს წინააღმდეგობა. მისი თქმით, მტერი შეტევაზე გადავა.

"ამ ღამეს მტერი გამოიყენებს ყველა იმ ძალას, რაც მას აქვს ჩვენი წინააღმდეგობის გასატეხად — ამაზრზენად, უხეშად და არაადამიანურად. ამ ღამით ისინი შეტევაზე წავლენ. ჩვენ ყველამ უნდა გავიგოთ რა გველოდება. ამაღამ უნდა გავუძლოთ. უკრაინის ბედი ახლა წყდება", — განაცხადა მან და დაამატა: "ღამე იქნება მძიმე, ძალიან მძიმე, მაგრამ იქნება დილა."

კიევში ისევ საჰაერო განგაშია ქალაქის ადმინისტრაცია მოსახლეობას მოუწოდებს, დაუყოვნებლივ ჩავიდნენ თავშესაფარსა და საცავებში. როგორც კიევის მერმა განაცხადა, დღეს დედაქალაქს მძიმე ღამე ელის, რადგან მტერი მათ საზღვრებთან ახლოსაა.

მას შემდეგ, რაც უკრაინის ოკუპირებული ტერიტორიები დამოუკიდებელ რესპუბლიკებად გამოაცხადა, პუტინმა თქვა, რომ "მათ დასაცავად" ჯარებს შეიყვანდა და მალევე უკრაინაში ომი დაიწყო. თავად პუტინი და მისი პროპაგანდისტები ამ ომს სპეციალურ "სამხედრო ოპერაციას" უწოდებენ.

კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია— იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან. ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტრნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგაქრებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში