პირველ რიგში, დაგამშვიდებთ და გეტყვით, რომ დენიელ რედკლიფი არ დაუკავებიათ და ის თავს კარგად გრძნობს.

საქმე ისაა, რომ ბრიტანეთში, კერძოდ კი, იორკში, ცხოვრობს ერთი 19 წლის ახალგაზრდა, რომელსაც არც მეტი, არც ნაკლები ჰარი ჰქვია და გვარად პოტერია. ჰოდა, სწორედ ეს ადამიანი დაიჭირეს მარიხუანის გასაღებისთვის.

როგორც USA Today იუწყება, პოტერი მოპედით, და არა ცოცხით, გადაადგილდებოდა, რა დროსაც პოლიციელმა გააჩერა და მისი საბუთების შემოწმებისას მარიხუანის მძაფრი სუნი იგრძნო.

მართვის მოწმობაზე სახელისა და გვარის ამოკითხვისას, პოლიციელს ალბათ ეგონა, რომ თვითონაც "დაბოლილი" იყო, მაგრამ არ დანებდა და მისტერ პოტერს პირდაპირ ციხეში უკრა თავი. სავარაუდოდ, პოლიციელმა არც ის დაიჯერა, რომ ჰარის მარიხუანა პროფესორი პომონა სპრაუტის ჰერბოლოგიის გაკვეთილისთვის სჭირდებოდა.