ევროკავშირი აცხადებს, რომ გმობს უკრაინის ტერიტორიაზე რუსეთის მხრიდან მძიმე შეიარაღების გამოყენებას და ტერიტორიების დაბომბვას, რაც მინსკის შეთანხმების დარღვევაა. განცხადებაში ვკითხულობთ, რომ ისინი მიესალმებიან უკრაინის პოზიციას პროვოკაციების ფონზე.

"ევროკავშირი გმობს მძიმე შეიარაღების გამოყენებას და სამოქალაქო ტერიტორიების დაბომბვას, რაც წარმოადგენს მინსკის შეთანხმებების და საერთაშორისო ჰუმანიტარული სამართლის აშკარა დარღვევას. ჩვენ მივესალმებით უკრაინის თავშეკავებულ პოზიციას მუდმივი პროვოკაციებისა და დესტაბილიზაციის მცდელობების ფონზე", — ვკითხულობთ განცხადებაში.

ევროკავშირი შეშფოთებულია ინსცენირებული მოვლენებით, რომლებიც შესაძლოა, ესკალაციის საბაბად იქცეს. განცხადებაში აღნიშნულია, რომ ევროკავშირი მოწმეა ინფორმაციის მანიპულირების მცდელობების გააქტიურების.

"ევროკავშირი უკიდურესად შეშფოთებულია იმით, რომ ინსცენირებული მოვლენები, როგორც ეს ახლახან აღინიშნა, შეიძლება გამოყენებულ იქნას შესაძლო სამხედრო ესკალაციის საბაბად. ევროკავშირი, ასევე, მოწმეა ინფორმაციის მანიპულირების მცდელობების გააქტიურების. ამ კონტექსტში, მტკიცედ გამოვხატავთ ჩვენს მხარდაჭერას ეუთოს სპეციალური სადამკვირვებლო მისიის მიმართ, რომლის დამკვირვებლები მთავარ როლს ასრულებენ დეესკალაციის პროცესში. ამ მისიას უნდა მიეცეს უფლება, შეასრულოს თავისი საქმე შეზღუდვების გარეშე აღმოსავლეთ უკრაინაში ხალხის სასარგებლოდ და უსაფრთხოებისთვის", — ნათქვამია განცხადებაში.

განცხადების მიხედვით, ევროკავშირი უსაფუძვლოდ მიიჩნევს ოკუპრებული დონეცკისა და ლუგანსკის ე.წ. მთავრობების ბრალდებას უკრაინის მხრიდან შესაძლო თავდასხმის შესახებ.

უკრაინის საზღვრებთან დაძაბულობა იმატებს. ამერიკის შეერთებული შტატების პრეზიდენტის, ჯო ბაიდენის განცხადებით, დარწმუნებულია, რომ რუსეთის პრეზიდენტმა მიიღო უკრაინაში შეჭრის გადაწყვეტილება. მისივე თქმით, მიზანში უკრაინის დედაქალაქს, კიევს ამოიღებენ.

18 თებერვალს დონეცკისა და ლუგანსკის თვითგამოცხადებული რესპუბლიკების ლიდერებმა მოსახლეობას ევაკუაციისკენ მოუწოდეს. ისინი ამტკიცებდნენ, თითქოს ზელენსკის ბრძანებით უკრაინის ჯარი თავდასხმას აპირებდა. უკრაინის სამხედრო ძალების მეთაურმა ოკუპირებული ტერიტორიების მაცხოვრებლებს მიმართა და ეს ცნობები უარყო. ამ ცნობებს სიცრუე უწოდა ზელენსკის ოფისმაც. როგორც მათ აღნიშნეს, რუსეთი ყველანაირად ცდილობს მათ პროცოცირებას.

თვითაღიარებულმა ლიდერებმა კი მოუწოდეს ადგილობრივებს, რუსეთის ტერიტორიაზე გადასულიყვნენ. მოგვიანებით ცნობილი გახდა, რომ რუსეთი ამ დასახლებიდან "დევნილებს" ერთჯერადად 10 000 რუბლს გადაუხდის.

უკრაინის საგარეო საქმეთა სამინისტრო აცხადებს, რომ სიმართლეს არ შეესაბამება გავრცელებული ცნობები, დონეცკსა და ლუგანსკზე შეტევის შესახებ. მათივე თქმით, სიცრუეა ისიც, რომ დონბასში დივერსია იგეგმება.

გაიგე მეტი: