საქართველოს ბანკი — ეროვნული საკალათბურთო ნაკრების მთავარი სპონსორი.

ნებისმიერი სპორტული ნაკრებისა თუ კლუბისთვის თაობათა ცვლა ერთ-ერთი ყველაზე რთული და, იმავდროულად, საინტერესო პროცესია. საქართველოს კალათბურთელთა ეროვნული ნაკრები ახლა სწორედ ამ გარდამავალ ეტაპზეა. საქართველოს საკალათბურთო ნაკრების სამწვრთნელო შტაბი დაკვირვებით ადევნებს თვალს პროცესს და ეძებს იმ ახალ სახეებს, რომლებიც მომავალში ეროვნული გუნდის ბირთვს შექმნიან. ბოლო მატჩებში ასეთ იმედისმომცემ ფიგურად ალექსანდრე მერკვილაძეს მიიჩნევენ, რომლის გამოჩენაც ქართულ საკალათბურთო სივრცეში დიდი ოპტიმიზმის საფუძველია.

მერკვილაძის გზა დიდ კალათბურთში ოკეანის გაღმიდან, კოლეჯების ლიგიდან (NCAA) იწყება, სადაც მან სოლიდური გამოცდილება მიიღო. განსაკუთრებით აღსანიშნავია ლოიოლა მერიმაუნტ ლაიონსის რიგებში გატარებული 4 პროდუქტიული წელი, სადაც ქართველმა კალათბურთელმა 1000-ზე მეტი ქულა დააგროვა. ისიც, რომ ამერიკაში ალექსანდრემ არა მხოლოდ ტექნიკური არსენალი გაიმდიდრა, არამედ გამოკვეთილი ლიდერული თვისებებიც გამოავლინა და კაპიტნის სამკლავურიც მოირგო.

ამერიკული წლების შემდეგ, კარიერის ახალი, ევროპული ეტაპი დაიწყო. ბერძნულ Aris Betsson-თან გაფორმებული 2-თვიანი კონტრაქტის შემდეგ, ქართველ ფორვარდს ნდობა ბელგიის საუკეთესო კლუბმა — ოსტენდემ გამოუცხადა. ალექსანდრემ მოლოდინი პირველივე მატჩებიდან გაამართლა და შედეგად, ეროვნული ნაკრების მთავარი მწვრთნელის, ალექსანდარ ჯიკიჩის ყურადღებაც მიიქცია.

მართალია, ჯიკიჩს მერკვილაძე მანამდეც ჰყავდა გამოძახებული, თუმცა მაშინ ტრავმის გამო საბოლოო, 12-კაციან განაცხადში მოხვედრა ვერ მოახერხა — მისი ოფიციალური დებიუტი მსოფლიო ჩემპიონატის საკვალიფიკაციო ეტაპზე, დანიის ნაკრების წინააღმდეგ შედგა და ის ნამდვილად შთამბეჭდავი გამოდგა.

დანიასთან ორმატჩიან დაპირისპირებაში (შინ და გასვლაზე) ალექსანდრემ მაყურებლის დიდი სიმპათია დაიმსახურა. პირველ შეხვედრაში მოედანზე არასრული 18 წუთი გაატარა, რა დროშიც 12 ქულა და 2 მოხსნა მიითვალა, ხოლო მომდევნო თამაშში მოედანზე 27 წუთი იყო, კვლავ 12 ქულა ჩააგდო და 8 მოხსნა შეასრულა. განსაკუთრებით აღსანიშნავია მისი სნაიპერული სიზუსტე: ალექსანდრემ ამ ორ შეხვედრაში 7-დან შვიდი სამქულიანი ჩააგდო, რითაც ეროვნული გუნდის ორ უმნიშვნელოვანეს გამარჯვებაში უდიდესი წვლილი შეიტანა.

მზადება გადამწყვეტი ბრძოლებისთვის

მსოფლიო ჩემპიონატის საკვალიფიკაციო ეტაპის მომდევნო მატჩების წინ საქართველოს ნაკრებმა ლატვიასთან მოსამზადებელი შეხვედრა გამართა და დამაჯერებელი ანგარიშით, 87:77 გაიმარჯვა. მერკვილაძე თამაშში სათადარიგოთა სკამიდან ჩაერთო და გუნდს 6 ქულითა და 3 მოხსნით დაეხმარა.

წინ რთული გამოცდა გველოდება: 2 ივლისს გასვლით შეხვედრაში უკრაინას დავუპირისპირდებით, ხოლო 5 ივლისს საშინაო არენაზე ესპანეთის უძლიერეს ნაკრებს ვუმასპინძლებთ. ამ ეტაპზე, ჩვენი ნაკრები ჯგუფში, სადაც ესპანეთი, უკრაინა და დანია ასპარეზობს, მე-3 ადგილს იკავებს. რეგლამენტის თანახმად კი, ჯგუფიდან სამი გუნდი გადის და მეორე საკვალიფიკაციო ეტაპზე ინაცვლებს, სადაც პირველ ეტაპზე დაგროვებული ქულებიც მიჰყვებათ. შესაბამისად, მომდევნო ორ მატჩს დიდი მნიშვნელობა ენიჭება.

ასეთ დაძაბულსა და ფიზიკურად რთულ თამაშებში შემადგენლობის სიღრმეს გადამწყვეტი მნიშვნელობა აქვს. ალექსანდრე მერკვილაძის მსგავსი, მაღალი კლასის კარგი მსროლელის კალათბურთელის ნაკრებში გამოჩენა სწორედ ის სიახლეა, რაც გუნდს მეტ მოქნილობასა და როტაციის უფრო ფართო შესაძლებლობას აძლევს. ასე რომ, წინ ივლისის გადამწყვეტი მატჩები გველოდება და ვნახოთ, როგორ გამოიყენებს ალექსანდრე მერკვილაძე თავის მორიგ შანსს ივლისის გადამწყვეტ შეხვედრებში.

ერთად ერთად ვუგულშემატკივროთ ქართველ კალათბურთელებს.

საქართველოს ბანკი — ეროვნული საკალათბურთო ნაკრების მთავარი სპონსორი.