კრემლისტური პარტია სოლიდარობა მშვიდობისთვის ლიდერი, რუსეთისა და საქართველოს ორმაგი მოქალაქე, ბიზნესმენი მამუკა ფიფია სოციალურ ქსელში ვიდეოს აქვეყნებს, ხელში ავტომატი უჭირავს, სამხედრო ფორმა აცვია, მკერდზე რუსული დროშა აქვს გამოსახული და ტანკზე ზის.

როგორც ფიფია აცხადებს, 2021 წელს, მოსკოვთან ახლოს, საბრძოლო ოფიცრებთან, ვეტერანებთან და სამხედრო სპეციალისტებთან ერთად სამხედრო-პატრიოტული კლუბი "არმატა ტური" შექმნა, სადაც "ახალგაზრდა მებრძოლების" გადამზადება ხდება. ვიდეოდან ცნობილი ხდება, რომ ამ კლუბში "წვრთნა" 10 000-მდე ახალგაზრდამ გაიარა.

"თუ მშვიდობა გინდა, ომისთვის მოემზადე. ამიტომ აქ ყველაფერი მაქსიმალურად მიახლოებულია რეალობასთან, უბრალოდ აქ ფუჭი ვაზნებით ისროდნენ. ომში ჯერ არ წავსულვარ, ნუ ნერვიულობთ. მაგრამ თუ საჭირო იქნება — წავალთ კიდეც", — ამბობს ფიფია.

ამავე ვიდეოსთან ერთად ის ტექსტსაც აქვეყნებს, სადაც წერს, რომ მათი "პატრიოტული ბანაკები" უკვე ათასობით ახალგაზრდამ და მოზარდმა გაიარა და "აქ ისინი მხოლოდ ტექნიკას ან ტაქტიკური მომზადების საფუძვლებს კი არ სწავლობენ — ისინი ითვისებენ ურთიერთდახმარების, გუნდური მუშაობისა და პასუხისმგებლობის ცნებებს".

"ადამიანი, რომელსაც არ ახსოვს თავისი წარსული, პატივს არ სცემს წინაპრების გმირულ საქმეებს და ივიწყებს ჩვენს საერთო დიდ გამარჯვებებს, ვერ შეძლებს შექმნას მტკიცე, დამოუკიდებელი ხვალინდელი დღე. სწორედ ეს ფიქრები ამოძრავებდა ჩემს გუნდსა და მე 2021 წელს, როდესაც მივიღეთ გადაწყვეტილება შეგვექმნა მასშტაბური და მნიშვნელოვანი პროექტი — სამხედრო-პატრიოტული კლუბი "არმატა ტური".

ჩვენ დავისახეთ ამბიციური, მაგრამ სასიცოცხლოდ აუცილებელი მიზანი: ახალგაზრდობისთვის ჩაგვენერგა დისციპლინის, ამხანაგობის, ისტორიისადმი ღრმა პატივისცემისა და ნამდვილი სულიერი სიმტკიცის გრძნობა. ამისთვის ჩვენ გავაერთიანეთ ძალისხმევა ნამდვილ პროფესიონალებთან — საბრძოლო ოფიცრებთან, ვეტერანებთან და სამხედრო სპეციალისტებთან, რომლებიც დღეს თავიანთ უნიკალურ გამოცდილებას გადასცემენ მომავალ თაობას.

ამ წლების განმავლობაში ჩვენი კლუბი მოსკოვის მახლობლად მდებარე ჩვეულებრივი სავარჯიშო ბაზის ფორმატს გასცდა. "არმატა ტური" მიზიდულობის მძლავრ ცენტრად იქცა. ჩვენი პროგრამები, პატრიოტული ბანაკები და ინტერაქტიური ისტორიული ღონისძიებები უკვე ათასობით ახალგაზრდამ და მოზარდმა გაიარა. აქ ისინი მხოლოდ ტექნიკას ან ტაქტიკური მომზადების საფუძვლებს კი არ სწავლობენ — ისინი ითვისებენ ურთიერთდახმარების, გუნდური მუშაობისა და პასუხისმგებლობის ცნებებს.

მე გულწრფელად ვამაყობ იმით, რომ პროექტს, რომელსაც საფუძველი ჩავუყარეთ, როგორც თანამოაზრეების ინიციატივას, დღეს რეალური შედეგები მოაქვს.

ჩვენ ვაგრძელებთ განვითარებას, რათა მოზარდი თაობა გაიზარდოს ძლიერი, ჯანსაღი და ჩვენი პაპების დიდი ტრადიციების ერთგული. მხოლოდ წინ მივიწევთ!", — წერს ფიფია.