უკრაინის საგარეო საქმეთა სამინისტრო აცხადებს, რომ სიმართლეს არ შეესაბამება გავრცელებული ცნობები, დონეცკსა და ლუგანსკზე შეტევის შესახებ. მათივე თქმით, სიცრუეა ისიც, რომ დონბასში დივერსია იგეგმება.

"ჩვენ კატეგორიულად უარვყოფთ რუსეთის მცდელობებს უსაფრთხოების ისედაც დაძაბული სიტუაციის ფონზე. ჩვენ მტკიცედ ვრჩებით პოლიტიკურ-დიპლომატიური მოგვარების ერთგული და ჩვენს პარტნიორებთან ერთად ვცდილობთ, შევამციროთ დაძაბულობა და შევინარჩუნოთ სიტუაცია დიპლომატიურ დიალოგთან შესაბამისობაში", — ნათქვამია განცხადებაში.

სამინისტრო აღნიშნავს, რომ ამის ნაცვლად, რუსეთი დეზინფორმაციის კამპანიებს აწარმოებს.

"მოვუწოდებთ საერთაშორისო თანამეგობრობას — სახელმწიფოებსა და საერთაშორისო ორგანიზაციებს, დაუყონებლივ დაგმონ რუსეთის ფედერაციის და მისი საოკუპაციო ადმინისტრაციების პროვოკაციები დონბასში, რომლებიც პოლიტიკური და დიპლომატიური მოგვარების პროცესს უთხრის ძირს", — ვკითხულობთ განცხადებაში.

18 თებერვალს დონეცკისა და ლუგანსკის თვითგამოცხადებული რესპუბლიკების ლიდერებმა მოსახლეობას ევაკუაციისკენ მოუწოდეს. ისინი ამტკიცებდნენ, თითქოს ზელენსკის ბრძანებით უკრაინის ჯარი თავდასხმას აპირებდა. უკრაინის სამხედრო ძალების მეთაურმა ოკუპირებული ტერიტორიების მაცხოვრებლებს მიმართა და ეს ცნობები უარყო. ამ ცნობებს სიცრუე უწოდა ზელენსკის ოფისმაც. როგორც მათ აღნიშნეს, რუსეთი ყველანაირად ცდილობს მათ პროცოცირებას.

თვითაღიარებულმა ლიდერებმა კი მოუწოდეს ადგილობრივებს, რუსეთის ტერიტორიაზე გადასულიყვნენ. მოგვიანებით ცნობილი გახდა, რომ რუსეთი ამ დასახლებიდან "დევნილებს" ერთჯერადად 10 000 რუბლს გადაუხდის.