პროკურატურამ შს მინისტრის ყოფილი მოადგილის, მერაბ მალანიას შვილს, გიორგი მალანიას გიგა ავალიანის საქმეზე ბრალდება წარუდგინა. მალანია თავდაპირველად დანაშაულის შეუტყობინებლობის ბრალდებით იყო დაკავებული, ახლა ჯგუფურად ჯანმრთელობის განზრახ მძიმე დაზიანებაში დახმარების მუხლით წარედგინა ბრალი, რაც 13 წლამდე თავისუფლების აღკვეთას ითვალისწინებს.

"გიორგი მალანიას ბრალდება საქართველოს სისხლის სამართლის კოდექსის 25, 117-ე მუხლის მე-3 ნაწილის "ლ" ქვეპუნქტით (ჯგუფურად ჯანმრთელობის განზრახ მძიმე დაზიანებაში დახმარება) წარედგინა, რაც სასჯელის სახედ და ზომად 13 წლამდე თავისუფლების აღკვეთას ითვალისწინებს.

გიორგი მალანიას დახმარებით, რომელიც გიგა ავალიანის მოსწავლე იყო, გაარკვიეს მისი სამუშაო და საცხოვრებელი ადგილის მისამართები, შეისწავლეს მისი სამუშაო გრაფიკი, რა გზით გადაადგილდებოდა სამსახურიდან სახლში. შეარჩიეს განზრახვის შესრულების ადგილი და დაიწყეს თვალთვალი," — განაცხადა პროკურატურამ.

სასამართლო პროცესის შემდეგ ყოფილმა მაღალჩინოსანმა, გიორგი მალანიამ მედიასთან კომენტარი გააკეთა. ის არ ეთანხმება შვილისთვის წარდგენილ არც ერთ ბრალს და დასძინა, რომ სამართლებრივ ბრძოლას საქართველოში და მის საზღვრებს გარეთაც გააგრძელებს.

"მე შეგნებულად არ ვაკეთებდი განცხადებას აქამდე, ვინაიდან მიმდინარეობდა გამოძიება. მე, რა თქმა უნდა, სრულად ვითავისებ იმ პასუხისმგებლობას, რომელიც მე მაკისრია, როგორც ყოფილ მაღალჩინოსანს და პოლიციელს. აქედან გამომდინარე ვიყავი ჩუმად. ბევრი ტალახი მესროლეს ამ პერიოდში, მაგრამ თმენის ვალდებულება მაქვს, ისევ მოგახსენებთ, როგორც ყოფილ პოლიციელს.

ჩემი შვილი დააკავეს შეუტყობინებლობის მუხლით, რაც ეხლა გადაკვალიფიცირდა 117-ე მუხლით, რაც გულისხმობს თავდასხმაში ხელშეწყობას. მე არ ვეთანხმებოდი არც პირველს, ანუ შეუტყობინებლობას, და არც ამას არ ვეთანხმები, რა თქმა უნდა, და ვაგრძელებ სამართლებრივ ბრძოლას საქართველოშიც და, თუ საჭირო გახდება, საზღვრებს გარეთაც. ეს იქნება ჩემი კომენტარი," — განაცხადა მალანიამ.