დაავადებათა კონტროლის ცენტრის ხელმძღვანელის, ამირან გამყრელიძის განცხადებით, ბუსტერი სერიოზულად იცავს ინფიცირებისგან, მათ შორის ომიკრონის შემთხვევაში, ასევე ჰოსპიტალიზაციისა და ფატალური გამოსავლისგან.

"ომიკრონის გადატანის შემდგომ გარკვეულად იმუნიტეტი დიდხანს არ რჩება, ამიტომ ყველასთვის ისევ მოწოდებაა აცრა, ვინც არ არის აცრილი და განსაკუთრებით ბუსტერი, ვინც 2-ჯერ აცრილია. ბუსტერზე უკვე ბევრი კვლევაა, სერიოზულად იცავს ინფიცირებისგან, მათ შორის ომიკრონის, ჰოსპიტალიზაციისგან და ფატალური გამოსავლისგან", — ამბობს ის.

იმ ფონზე, როდესაც ქვეყანაში ანტივაქსერული განწყობები მაღალია, ხოლო ვაქცინაციის მაჩვენებელი დაბალი, პრემიერმინისტრმა, ირაკლი ღარიბაშვილმა განაცხადა, რომ ომიკრონის შემთხვევაში ვაქცინა "არ მუშაობს" და ვაქცინირებულ პირს კორონავირუსი "ჩვეულებრივ" ემართება.

31 დეკემბრის მონაცემებით, საქართველოში კორონავირუსის საწინააღმდეგო ვაქცინის ბუსტერ დოზა 73 774 ადამიანს ჰქონდა გაკეთებული. NCDC-ის მიერ გამოქვეყნებული ახალი ანგარიშის თანახმად კი, მათგან მხოლოდ 6-ს დასჭირდა ჰოსპიტალიზაცია. ამასთან, 15 მარტიდან 31 დეკემბრის პერიოდის მონაცემების მიხედვით, ბუსტერ დოზა 99,78%-ით იცავს ჰოსპიტალიზაციისა და კრიტიკული მოვლის საჭიროებისგან. NCDC-ის მიხედვით, ამავე პერიოდში, ბუსტერ დოზამ კორონავირუსით გამოწვეული სიკვდილის არიდება 99,78%-ით შეძლო.

გაიგე მეტი: