საქართველოს ბანკისა და USAID-ის ეკონომიკური უსაფრთხოების პროგრამის ერთობლივი პროექტი კვლავ გრძელდება. პროექტის მიზანს მსუბუქი მრეწველობის მიმართულებით ოპერირებადი მცირე და საშუალო ბიზნესის მხარდაჭერა წარმოადგენს. უკვე 20-ზე მეტმა მონაწილე კომპანიამ მიიღო დარგის ექსპერტებისგან ინდივიდუალური კონსულტაციები და ტრენინგები. მათ შორისაა კომპანია დიო.

დიო უკვე 26 წელია ქართულ სამშენებლო ბაზარზე ოპერირებს და მომხმარებელს 70-მდე დასახელების პროდუქციას სთავაზობს, მათ შორის: მეტალოპლასტმასისა და ალუმინის კარ-ფანჯარას, სლაიდურ სისტემებს და სხვა. დიო სამ საწარმოო სივრცეს აერთიანებს და 200-მდე ადამიანს ასაქმებს. გარდა წარმოებისა, კომპანია მომხმარებელს საკონსულტაციო, აზომვით და სამონტაჟო სერვისებსაც სთავაზობს.

"ამ ეტაპზე ჩვენი მიზანი მომხმარებელთა სექტორისა და პროდუქციის გაფართოებაა. ასევე, ვგეგმავთ ექსპორტზე გასვლას. ამ მიმართულებით ჩვენს კომპანიას არც ისე დიდი გამოცდილება აქვს, ამიტომ საქართველოს ბანკისა და USAID-ის ეკონომიკური უსაფრთხოების პროგრამის ერთობლივ პროექტში ჩართულობა და ექსპორტის თემატიკაზე მიღებული კვალიფიციური რჩევები ჩვენთვის ძალიან მნიშვნელოვანია. მიღებული გამოცდილება საექსპორტო ბაზრების სწორად განსაზღვრასა და სამოქმედო გეგმის შემუშავებაში გვეხმარება", — ამბობს დიოს დამფუძნებელი ირმა დაუშვილი. "დღეს მომხმარებელს ქვეყნის მასშტაბით სამი ფილიალიდან ვუწევთ მომსახურებას. ქალაქ ქუთაისში არსებულ საწარმოში კი, პირველად საქართველოში, უზრუნველვყოფთ ავტომატიზებული საჩრდილობლის — პერგოლას წარმოებას. სამომავლოდ, ვგეგმავთ კიდევ უფრო განვავითაროთ მინა პაკეტების წარმოების მიმართულება", — დაამატა მან.

"მოხარულები ვართ, რომ ჩვენი და USAID-ის ეკონომიკური უსაფრთხოების პროგრამის ფარგლებში გვეძლევა შესაძლებლობა, დიოს სამომავლო გეგმების განხორციელებაში შევუწყოთ ხელი. კომპანია წლების მანძილზე მნიშვნელოვნად იზრდება, ავითარებს პროდუქციას და დღეს ბაზარზე თანამედროვე ტექნოლოგიებით აღჭურვილი, ერთ-ერთი მოწინავე კომპანიაა. ამ უკანასკნელს უკვე 26 წელია იცნობს ადგილობრივი მომხმარებელი და მოხარულები ვართ, რომ უახლოეს მომავლში დიოს პროდუქცია მეზობელ ქვეყნებშიც იქნება ხელმისაწვდომი. გვინდა მათ გუნდს წარმატება ვუსურვოთ. საქართველოს ბანკი მომავალშიც აქტიურად გააგრძელებს ადგილობრივი ბიზნესის მხარდაჭერას", — განაცხადა ზურაბ მასურაშვილმა, საქართველოს ბანკის მცირე და საშუალო ბიზნესის მიმართულების ხელმძღვანელმა.

"აღნიშნული პროექტი ქართველ მეწარმეებს სთავაზობს პრაქტიკულ მომსახურებას, მათ შორის საბაზრო კავშირების გაღრმავების, საერთაშორისო სტანდარტებზე წვდომისა და მცირე და საშუალო ბიზნესის დაფინანსების შესაძლებლობებს. ეს გახლავთ ერთ-ერთი იმ ინიციატივათა შორის, რომლის საშუალებითაც USAID– ის ეკონომიკური უსაფრთხოების პროგრამა უზრუნველყოფს ეკონომიკის სექტორებში დროულ, პრაქტიკულ დახმარებას, მაღალკვალიფიციური კადრების დასაქმებასა და ეკონომიკური ზრდის ხელშწყობას. ჩვენ მოხარულები ვართ, რომ საქართველოს ბანკთან ერთად, მცირე და საშუალო საწარმოებს საკუთარი ბიზნესის განვითარებაში ვუჭერთ მხარს", — აღნიშნა მარკ მაკკორდმა, USAID-ის ეკონომიკური უსაფრთხოების პროგრამის ხელმძღვანელმა.