ამერიკის შეერთებული შტატების სახელმწიფო მდივანმა, ენტონი ბლინკენმა ჯოზეფ ბორელთან ერთად გამართულ პრესკონფერენციაზე მინსკის შეთანხმებაზე ისაუბრა და თქვა, რომ მაშინ, როდესაც უკრაინა შეთანხმებით გათვალისწინებულ თითქმის ყველა ვალდებულების შესრულებას ცდილობდა, რუსეთს არცერთი მათგანი არ შეუსრულებია.

"ამერიკის შეერთებული შტატები და უკრაინა თანხმდებიან იმაზე, რომ მინსკი არის დონბასში კონფლიქტის მოგვარების გზა, რაც რუსეთის შეჭრამ გამოიწვია 2014 წელს და საუკეთესო გზა საზღვრის აღდგენისთვის, მისი სუვერენიტეტის აღდგენისთვის, ისევე, როგორც უკრაინის მოქალაქეების, მათ შორის, დონბასში მცხოვრებთა უფლებების დაცვის.

ბოლო წლების განმავლობაში უკრაინამ ბევრჯერ სცადა მინსკის შეთანხმების განხორციელება. ვფიქრობ, თუ შევხედავთ მინსკის შეთანხმების პირობებს, სამ შეთანხმებას რამდენიმე თვის განმავლობაში, სამართლიანი იქნება იმის თქმა, რომ უკრაინა ცდილობდა წინსვლას უმეტეს მათგანზე, თუ ყველაზე არა მაშინ, როდესაც რუსეთმა ფაქტობრივად არცერთი მათგანი არ შეასრულა", — განაცხადა მან პრესკონფერენციაზე.

რუსეთის პრეზიდენტმა, ვლადიმერ პუტინმა 7 თებერვალს საფრანგეთის პრეზიდენტთან ერთად გამართულ პრესკონფერენციაზე განაცხადა, რომ კიევში ხან ამბობენ, რომ არ შეასრულებენ მინსკის შეთანხმებას, ხან ამბობენ, რომ ეს მათ ქვეყანას დაანგრევს, თუმცა ამის შესრულება მაინც მოუწევთ.

"მოქმედმა პრეზიდენტმა ცოტა ხნის წინ განაცხადა, რომ არცერთ პუნქტი არ მოსწონს მინსკის შეთანხმებიდან. ნუ, მოგწონს, არ მოგწონს, მოითმინე, ჩემო ლამაზო! უნდა შეასრულო! სხვანაირად არ გამოვა", — განაცხადა მან პრესკონფერენციაზე.

პუტინის ამ განცხადების შემდეგ ისაუბრა ემანუელ მაკრონმაც და ხაზი გაუსვა, რომ ზელენსკი იმ ქვეყნის პრეზიდენტია, რომლის საზღვართანაც 125 000 რუსი ჯარისკაცი დგას და "დიახ, ის ნერვიულობს". მისი თქმით, ამ შეთანხმების ხელმოწერის დროს სიტუაცია სხვა იყო.