შავი ხვრელისთვის ფოტოს გადაღება უკვე დიდი ხანია იგეგმება. ამისთვის, ასტრონომები Event Horizon Telescope-ის გამოყენებას გეგმავდნენ.

პროექტზე მომუშავე ასტრონომების თქმით, გუშინ, 5 დღიანი შეუჩერებელი მუშაობის შედეგად, შავი ხვრელის პირველი ფოტო გადაიღეს. ფოტოს გამჟღავნებას ერთი თვე დასჭირდება და მხოლოდ ამის შემდეგ გვეცოდინება რა გადაიღეს ასტრონომებმა და რა საიდუმლოს მალავს ჩვენი გალაქტიკის ცენტრში მდებარე სუპერმასიური შავი ხვრელი მშვილდოსანი A (Sagittarius A).

"იმის ნაცვლად, რომ შეგვექმნა ისეთი ზომის ტელესკოპი, რომელიც თავისივე წონის შედეგად დაიშლებოდა, ჩვენ ერთმანეთთან 8 ობსერვატორია დავაკავშირეთ და შევქმენით ვირტუალური ტელესკოპი, რომლის დიამეტრიც 10 ათასი კილომეტრია", განაცხადა EHT-ის პროექტის მენეჯერმა, მაიკლ ბრემერმა.

შავი ხვრელი, რომელიც ჩვენგან 26 ათასი სინათლის წელიწადითაა დაშორებული მშვილდოსნის თანავარსკვლავედში მდებარეობს და მისი მასა ჩვენს მზეზე 4 მილიონჯერ დიდია.

ობსერვატორიების შეგროვებული მასალა, თითოეული მათგანიდან დაახლოებით 500 ტერაბაიტი, MIT-ს Haystack Observatory-ში ჩაიტანენ, სადაც სუპერკომპიუტერებით დამუშავდება და ბოლოს შავი ხვრელის ფოტოსაც ვიხილავთ.