თბილისის საქალაქო სასამართლომ ფეისბუქის ქართველ მომხმარებელს, ცილისწამების საქმის დასრულებამდე საჯარო პოსტის Only Me-ზე გადაყვანა დაავალა, რაც იმას ნიშნავს, რომ პოსტის ნახვას მის გარდა ვერავინ შეძლებს. როგორც საქმის ადვოკატმა, სერგი ჯორბენაძემ On.ge-ს განუცხადა, დავა ორ ფიზიკურ პირს შორისაა, სარჩელი კი Facebook-სა და YouTube-ზე გამოქვეყნებული შესაძლო ცილისმწამებლური პოსტის უარყოფას ეხება.

მისივე ინფორმაციით, მომხმარებელმა YouTube-ზე განთავსებული ვიდეოს საჯაროობაც უნდა შეზღუდოს, ასევე საქმის დასრულებამდე, ის Facebook პროფილს ვერ გააუქმებს.

"სასამართლო დავა გრძელდება საკმაოდ დიდხანს, შეიძლება, რამდენიმე თვეც გაგრძელდეს ყველა ინსტანცია. ჩვენ მოვითხოვეთ სარჩელის უზრუნველყოფა, სანამ სასამართლო დავა დასრულდება, პოსტზე წვდომა არ უნდა ჰქონდეს ნებისმიერ სხვა პირს, ამიტომ მოვითხოვეთ Only Me-ზე გადაყვანა, YouTube-ზე გასაჯაროების აკრძალვა. ასევე FB ანგარიშის გაუქმების შეზღუდვა, ეს შუამდგომლობა სასამართლომ დააკმაყოფილა', — გვითხრა მან.

ადვოკატის თქმით, სარჩელი სასამართლოს ორშაბათს, 31 იანვარს წარედგინა და პირველ თებერვალს საქალაქომ შუამდგომლობა დააკმაყოფილა. On.ge დამატებითი ინფორმაციისთვის საქალაქო სასამართლოს დაუკავშირდა და მათგან პასუხს ველოდებით.