ახალგაზრდა იურისტთა ასოციაციის იურისტი გიორგი გოცირიძე ამბობს, რომ საკონსტიტუციო კომისიაში უარი თქვეს სამოქალაქო სექტორის შეთავაზებაზე, რომ კანონით დარეგულირებულიყო ურთიერთობის სხვა ფორმებიც, მაშინ, როდესაც განისაზღვრებოდა ქორწინება, როგორც ქალისა და კაცის ერთობა:

"ჩვენი პირველი მოწოდება იყო ის, რომ არ გაჩენილიყო ასეთი სახის ჩანაწერი, იმიტომ რომ ამას მოჰყვებოდა ძალიან ცუდი გამოხმაურება, ეს იქნებოდა ძალიან ცუდი მესიჯი და გარკვეულწილად იმ ძალადობის წახალისება, რომელსაც ყოველდღიურად ხვდებიან ლგბტ თემის წარმომადგენლები. შემდგომ, ალტერნატიული ვარიანტით უნდა ჩაწერილიყო, რომ ქორწინება იყო ქალისა და კაცის ნებაყოფლობითი კავშირი და იმავდროულად, ამ მუხლს დამატებოდა ისიც, რომ თანაცხოვრების სხვა ფორმები რეგულირდებოდა კანონით, მათი მხრიდან მივიღეთ პასუხი, რომ თუკი ასეთ რაღაცას ჩაწერენ, ეს ნიშნავს იმავდროულად პოლიგამიის დაკანონებას".

საკონსტიტუციო კომისიის სამუშაო ჯგუფისთვის შეთავაზებული მმართველი გუნდის პროექტით, ქორწინება განისაზღვრება, "როგორც ქალისა და მამაკაცის კავშირი".

გეი ქორწინების კონსტიტუციური აკრძალვა ქართული ოცნების ერთ-ერთი მთავარი წინასაარჩევნო დაპირება იყო.

ერთი და იმავე სქესის მქონე პირთა ქორწინება კანონმდებლობით ისედაც აკრძალულია, ხოლო ლგბტ ჯგუფების მხრიდან ქორწინების თანასწორობის მოთხოვნა არასდროს დამდგარა. მიუხედავად ამისა, გასული წლების განმავლობაში თემა არა ერთხელ გამხდარა პოლიტიკური მანიპულაციების საგანი.