ჭიათურის გამამდიდრებელ კომბინატ ცოფ-1-ში ზეინკალი მესამე სართული კიბიდან ჩამოვარდა და პირველ სართულზე დაცემისას გარდაიცვალა. ამის შესახებ ინფორმაცია ფეისბუკში, დაახლოებით 12 საათის წინ, საქართველოს მეტალურგიული და სამთო მრეწველობის მუშაკთა პროფკავშირების ხელმძღვანელმა, თამაზ დოლაბერიძემ გაავრცელა.

გარდაცვალების შემთხვევას ადასტურებენ შინაგან საქმეთა სამინისტროს პრესსამსახურშიც. მათი ინფორმაციით, გამოძიება სისხლის სამართლის კოდექსის 240-ე მუხლით დაიწყო. ამ მუხლით, უსაფრთხოების წესის დარღვევა სამთო, სამშენებლო ან სხვა სამუშაოს წარმოებისას, რამაც გამოიწვია ადამიანის სიცოცხლის მოსპობა ან სხვა მძიმე შედეგი ისჯება თავისუფლების შეზღუდვით ვადით ხუთ წლამდე, ან თავისუფლების აღკვეთით ვადით ორიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე, ან უამისოდ.