ადამიანები რომ მფრინავი მანქანებით ივლიდნენ, ამის 1985 წელსაც სჯეროდათ. ფიქრობდნენ, რომ ამ ტექნოლოგიურ გარღვევამდე სულ რაღაც 25-30 წელიღა იყო დარჩენილი, მაგრამ, როგორც სხვა ყველაფერში, კაცობრიობამ აქაც ვერ გაამართლა მოლოდინები.

ცხადია, ამ ხნის განმავლობაში ბევრი და საოცარი აღმოჩენებისა და გარღვევების მომსწრენი გავხდით, მაგრამ მფრინავი მანქანები მაინც ყველას გვინდა. განსაკუთრებით მათ, ვინც სამეცნიერო ფანტასტიკას ვეტრფით და თან თბილისში ვცხოვრობთ.

მფრინავი მანქანები აქაური საცობებისთვის მისწრება იქნება, თუმცა პარკირების პრობლემა მაინც გადასაჭრელი გაგვიხდება. ერთ დილას აივანზე გამოსულს, იქ შეიძლება რომელიღაც მფრინავი ბაბულიკის მფრინავი BMW დაგხვდეთ. ეს ყველაფერი რამდენად ფუტურისტულადაც გამოიყურება, იმდენად რეალურია და თანაც ძალიან მალე შეიძლება მოხდეს.

Aeromobile სლოვაკური სტარტაპია, რომელიც მფრინავი მანქანის პროტოტიპი 2014 წელს წარმოადგინა, ხოლო რამდენიმე დღეში, 20 აპრილს, მონაკოში გამართულ ავტოშოუზე უკვე მუშა ტრანსპორტსაც წარმოადგენს.

ფოტო: Aeromobile

მანქანის შესახებ ბევრი არაფერია ცნობილი, არც ფასი, არც მახასიათებლები.

აერომობილის განცხადებით, მანქანა ჩვეულებრივი ავიატრანსპორტიცაა და ავტომობილიც, რომლითაც ხან იფრენთ და ხანაც მიწაზე ივლით.

ეს ვიდეო, რომელშიც პტოტოტიპის ნახვა შეგიძლიათ, 2014 წლისაა. სწორედ ამ მანქანის რეალური და მუშა ვერსიის წარმოდგენას გვპირდებიან მონაკოს ავტოშოუზე.

როგორც კომპანიაში აცხადებენ, მანქანას ასაფრენად და დასაჯდომად მოკლე ბილიკი სჭირდება - აფრენისთვის საჭირო სიჩქარის ასაკრეფად ავტომობილს 200 მეტრიანი ტრასა ჰყოფნის, ხოლო დასაფრენად, აერომობილის განცხადებით, 50 მეტრიც საკმარისია.

მანქანის შესახებ ყველა დეტალი ავტოშოუზე გახდება ცნობილი და მისი პრე-ორდერით შეძენა წელსვე შეგეძლებათ. თუმცა როდის მოგართმევენ კუთვნილ მფრინავ მანქანას სახლში, ეს ჯერ უცნობია.