სოციალურმა ქსელებმა ჩვენი ყოველდღიურობა იმდენად მოიცვა, რომ ხშირად რეალურსა და ვირტუალურს შორის ზღვარის გავლებაც კი გვიჭირს. სხვადასხვა პლატფორმაზე შექმნილი ტრენდები ჩვენზე მცირედით მაინც ახდენენ გავლენას. თუმცა, უნდა ვაღიაროთ, რომ ტენდენციები, რომლებიც ინტერნეტსივრცეში ჩნდება, ზოგჯერ არაჯანსაღია.

1. პროდუქტიულობის განდიდება

"როგორ ვიყოთ პროდუქტიული მაშინ, როცა სამყაროს აღსასრულია".

პროდუქტიული, პროდუქტიულმა, პროდუქტიულს, პროდუქტიულის... გავიგეთ! აუცილებელი არ არის, ძილშიც დოვლათს ვქმნიდეთ, რომ ადამიანად ვიგრძნოთ თავი. ალბათ ზოგჯერ მაინც გვაქვს უფლება, ისეთი გატაცება გვქონდეს, რომელიც, უბრალოდ, სიამოვნებას გვანიჭებს.

2. იდეალური ცხოვრების იდეა

"თმა არ დამივარცხნია — ანუ მეც თქვენნაირი მოკვდავი ვარ".

ალიონზე ჭიქა ყავით (რა თქმა უნდა, ყავის აპარატით დამზადებულის) მირთმევა და ძვირიანი სასტუმროს აივანზე "მოუწესრიგებელი" თმით სელფის გადაღება.

• 5 მარტივი გზა, როგორ გაუმკლავდე ნეგატიურ გარემოს სოციალურ ქსელში

3. განსხვავებული მოსაზრების შეუწყნარებლობა

"როგორ ბედავ და, ხაჭაპურს ლობიანს ამჯობინებ?!"

რასიზმი, სექსიზმი, ჰომოფობია და სხვა საზიანო იდეა, რომელიც თავადვეა შეუწყნარებლობა, ვერასდროს იქნება სადისკუსიო სივრცის ნაწილი. თუმცა, რატომ შეიძლება გემოვნებაზე გამუდმებით ვკამათობდეთ, ვამტკიცებდეთ ჩვენს აზრს და ყველაფრის, მათ შორის, ზოგჯერ შეურაცხყოფის ფასად ვცდილობდეთ, ოპონენტი გადავარწმუნოთ?!

4. საჯარო გლოვა

"მე არ მჯერა, რომ მაგით გარდაიცვალა".

ვირტუალურმა გარემომ ალბათ ნაწილობრივ მაინც მოშალა ის ეთიკური პრინციპები, რომლებიც ადამიანებს რეალურ სივრცეში დელიკატურ საკითხებზე უხერხული კითხვებისგან თავის შეკავებას აიძულებდა ხოლმე. ეს ყველაზე თვალსაჩინო მაშინაა, როცა უბედური შემთხვევის შემდეგ საჯარო განხილვა იწყება და ახლობლების მდგომარეობასა და ინტერესებს ივიწყებენ.

5. მენტალური ჯანმრთელობის საკითხების არასწორად წარმოჩენა

"დეპრესიული aesthetics"

სტიგმას, რომელიც მენტალური ჯანმრთელობის საკითხებზე და მათ შესახებ ღიად საუბარზე ჯერ კიდევ არსებობს, აუცილებლად უნდა ვებრძოლოთ. თუმცა, ამ საქმეში არათუ სასარგებლო, არამედ საზიანო შედეგიც კი მოაქვს სერიოზულ თემებზე არასერიოზულად საუბარს — უფრო ზუსტად, მენტალური ჯანმრთელობის პრობლემების არასწორად წარმოჩენას.

6. სილამაზის არარეალისტური სტანდარტები

"ამბობენ, ლამაზ სხეულში ლამაზი სულიაო".

არანაირი ცელულიტი, იდეალურად გაპარსული ფეხი და სხვა ბევრი სტანდარტი, რომელიც ადამიანებს ბუნებრიობას, ხშირად კი საკუთარ თავსაც კი აძაგებს.

7. უცხო ადამიანების მალულად გადაღება

"არა, არა, არ ვიღებ".

საჯარო სივრცის შესახებ ყველას გვსმენია, მაგრამ უცხო ადამიანების ნებართვის გარეშე გადაღება და გასაჯაროება, განსაკუთრებით მაშინ, როცა ეს მიზნად სოციალურ ქსელში პიროვნების დაცინვას ან დისკრედიტაციას ისახავს, ასევე არ ჯდება არანაირ ეთიკურ ჩარჩოში.

8. ბავშვების ინფლუენსერად ქცევა

"ნახეთ, რა გააკეთა..."

ბავშვის მუდამ კამერის წინ მოქცევა, მისი ყველა ნაბიჯის გადაღება და გასაჯაროება (ფინანსური) სარგებლის მიღების მიზნით, მით უმეტეს, რომ ეს მასალა ინტერნეტის უკონტროლო სივრცეში სწრაფად ვრცელდება და ხშირად სამუდამოდ რჩება, ასევე ტოქსიკურია.

9. ინფლუენსერები, რომლებიც რჩევას ყველაფერზე იძლევიან

"ბედნიერება თუ გინდათ, უბრალოდ, სახლი იყიდეთ".

დაწყებული ისეთი უწყინარი საკითხიდან, როგორიც "ბედნიერების ფორმულაა", დამთავრებული დიეტის რეცეპტებით და მკურნალობის მეთოდებით — ბევრი ინფლუენსერი სულაც არ იშურებს რჩევებს თავისი ფართო და მრავალფეროვანი აუდიტორიისთვის. თუმცა, აუცილებელია, გვახსოვდეს, რომ ზოგჯერ რჩევა მხოლოდ კომპეტენტური პირისგან მიიღება, სხვა შემთხვევაში კი ის ან სასაცილოა, ან უარესი — საზიანო.

10. და ადამიანები, რომლებიც მათ ყველაფერზე გამოხმაურებას სთხოვენ

"ბრიტანეთისთვის ბრექსიტის შედეგებზე რატომ არაფერს ამბობ???"

საზოგადოებისთვის საჭირობოროტო საქმეში საკუთარი როლის გააზრება მნიშვნელოვანია, თუმცა, წინა პუნქტის არ იყოს, ზოგ საკითხზე სასაუბროდ კომპეტენციაა საჭირო. შესაბამისად, გასართობი კონტენტის შემქმნელებისგან იმის მოთხოვნა, რომ პოლიტიკურ-ეკონომიკურ საკითხებზე დაიწყონ სჯა-ბაასი, არასწორია, ამის ტენდენციად ქცევა კი — უკვე ტოქსიკური.