თავდაცვის მინისტრმა ლევან იზორიამ პარლამენტში კომიტეტის სხდომაზე განაცხადა, რომ საქართველოს სამხედრო სტრატეგია მის ფინანსურ შესაძლებლობებზეცაა დამოკიდებული.

"ხშირად მსმენია კრიტიკა, თითქოს ფლოტზე ან ავიაციაზე უარს ვამბობთ, არაფერზე არ ვამბობთ უარს, პრიორიტეტებს განვსაზღვრავთ ჩვენი ფინანსური შესაძლებლობიდან და სამხედრო სტრატეგიიდან გამომდინარე. ფინანსური შესაძლებლობები ჯობია მივმართოთ იმისკენ, რაც ჩვენს თავდაცვას ყველაზე მეტად უზრუნველყოფს" - განაცხადა მინისტრმა.

იზორიას თქმით, საქართველოს თავდაცვისთვის აუცილებელი სტრატეგია აგვისტოს ომის გამოცდილებიდანაც უნდა გაითვალისწინოს:

"რუსეთის ომმა, სწორედ ეს გვაჩვენა, შეიძლება გყავდეს ბომბდამშენები, რამდენიმე ერთეული ათეული, მაგრამ, თუ მათი დაცულობის ხარისხი ნულის ტოლია, თუ აეროდრომების ინფრასტრუქტურა დაცული არ არის, შეიძლება ერთმა რაკეტამ მწყობრიდან გამოიყვანოს ათეულობით ბომბდამშენი.

ჩვენ ვსწავლობთ გამოცდილებიდან და ვაკეთებთ ამას პასუხისმგებლიანად, რადგან ეს თანხები, რაც უწყებას აქვს, არის გადამხდელისგან მობილიზებული თანხები და პირველ რიგში, მოქალაქეს, ვინც ამ თანხებს იხდის, აქვს ლეგიტიმური კითხვა და მოთხოვნა, ჩვენს მიმართ, რამდენად ვიქნებით დაცული ომის შემთხვევაში, რამდენად ვიქნებით დაცული კრიზისის შემთხვევაში".

იზორიას თქმით, მომავალ კვირას ის საფრანგეთში თავის კოლეგას, საფრანგეთის თავდაცვის მინისტრს, შეხვდება, სადაც ის ანტისაჰაერო სისტემის შეძენაზე მოლაპარაკებებს გამართავს:

"17-18 აპრილს საფრანგეთში ვიქნები, სადაც ანტისაჰაერო სისტემის შეძენის, იმპლემენტაციის გეგმებს განვიხილავთ, აქტიურ ფაზაში შევდივართ 2017-2018 წლებში. ჩვენ ამის მზაობა და ამის პრინციპული პოზიცია დავაფიქსირეთ. უპრეცენდენტოდ კარგი მხარდაჭერა გვაქვს ჩვენს პარტნიორებთან".

იზორიამ განაცხადა, რომ საქართველოს ისეთ პარტნიორებთან, როგორიცაა ფინეთი და შვედეთი, ერთიანი სტრატეგიები უნდა ჰქონდეს, რაც ტოტალური თავდაცვის კონცეფციას გულისხმობს.

როგორც თავდაცვის მინისტრმა თქვა, საფრანგეთიდან საჰაერო თავდაცვის სისტემის პარალელურად, გადაამზადებენ 40-მდე პირს, რომლებიც შეძლებენ ამ სისტემის მართვას. გარდა ამისა, სამინისტრო გეგმავს სხვა მნიშვნელოვანი სამხედრო აღჭურვილობის შეძენას.