დაავადებათა კონტროლის ცენტრის დირექტორის, ამირან გამყრელიძის განცხადებით, ქვეყანა, შეიძლება, თებერვლის პირველ დეკადაში პიკში შევიდეს და დღიურად იყოს ინფიცირების 60 000-მდე შემთხვევა, რომლიდანაც გამოვლინდება 20-30%.

"ჩვენ შეიძლება პიკში შევიდეთ სადღაც თებერვლის პირველ დეკადაში და შეიძლება იყოს დღიურად 60 000-მდე შემთხვევა, რომლიდანაც გამოვლინდება 20-30%, ანუ ლაბორატორიულად. ანუ სადღაც შეიძლება გვქონდეს დღიურად 10-12 000, 15 000-მდე შემთხვევის დატვირთვა. ამისთვის ჯანდაცვის სექტორი მთლიანად, როგორც ამბულატორიული და მე დარწმუნებული ვარ ძირითადი დატვირთვა მაინც ამბულატორიულ სექტორზე იქნება, მაგრამ კლინიკებიც ძალიან მნიშვნელოვანია.

ჩვენ ერთდროულად გვქონია მაქსიმუმ 7 000-მდე, 6 000-მდე შემთხვევა აგვისტოში. როცა ერთდროულად იქნება ბევრი შემთხვევა, რა თქმა უნდა, პროპორციულად თვითონ საერთაშორისო კვლევითი მონაცემებით, ომიკრონის დროს ჰოსპიტალიზაციის მაჩვენებელი მერყეობს 5-დან 10%-მდე მაშინ, როცა დელტას დროს ეს მაჩვენებელი იყო 12, 15, 20%-მდე", — განაცხადა გამყრელიძემ.

11 იანვრის მონაცემებით, საქართველოში კორონავირუსის 5 486 ახალი შემთხვევა დადასტურდა, გამოჯანმრთელდა 2 893, ხოლო გარდაიცვალა — 46 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 968 313-ს, მათგან გამოჯანმრთელდა — 916 421, ხოლო ვირუსს ჯამში ემსხვერპლა 14 264 ადამიანი.

ბოლო 24 საათში ქვეყნის მასშტაბით ჩატარდა 57 546 კვლევა ტესტით. მათ შორის ანტიგენის სწრაფი ტესტით — 39 284, ხოლო PCR-ით — 18 262.