ჩილეს პრეზიდენტის სასახლის წინ გამართულ აქციაზე ოთხი მეფუტკრე დააკავეს, რომლებიც თაფლის წარმოებაში არსებულ პრობლემებს აპროტესტებდნენ. ხანგრძლივმა გვალვამ ფუტკრის საკვები წყაროები გაანადგურა, რის შედეგადაც თაფლის წარმოება შემცირდა. მიუხედავად იმისა, რომ გვალვა ჩილესთვის ხშირი მოვლენა არასდროს ყოფილა, ამჟამინდელი გვალვა თითქმის 2010 წლიდან დაიწყო და დღემდე გრძელდება, რასაც მეცნიერები კლიმატის ცვლილებას უკავშირებენ.

მეფუტკრეები ითხოვდნენ, რომ ან თაფლის ფასი გაზრდილიყო ან მთავრობა დაზარალებულებს სუბსიდიით დახმარებოდა. მეფუტკრეებმა პრეზიდენტის სასახლის წინ 60 სკა განათავსეს, რომლებშიც დაახლოებით 10 ათასი ფუტკარი იყო. "ფუტკრები იხოცებიან. სწორედ ამის ხაზგასმა გვინდოდა ასეთი დემონსტრაციით", — განაცხადა სკების შესახებ ერთ-ერთმა მეფუტკრემ.

ფოტო: Reuters

სოფლის მეურნეობის სამინისტროს წარმომადგენელმა კი განაცხადა, რომ მთავრობა შეშფოთებულია ფუტკრებზე გვალვის ზემოქმედებით. მისი თქმით, მთავრობა თვეების განმავლობაში ეხმარებოდა 20 დასახლებას, რომლებიც წყლის მწვავე დეფიციტი აქვთ.

ჩილეს პოლიციის განცხადებით, ათასობით ფუტკარმა შვიდი ოფიცერი დაკბინა, რომლებიც მეფუტკრეების დაკავებასა და სკების ქუჩიდან გადატანას ცდილობდნენ. პოლიციელები მაშინვე საავადმყოფოში გადაიყვანეს.

გვალვამ და კლიმატის ცვლილების შედეგად გამოწვეულმა ტემპერატურის მატებამ ფუტკრების პოპულაციაზე მთელ მსოფლიოში მოახდინა გავლენა. 2020 წელს ჟურნალ Science-ში გამოქვეყნებულმა კვლევამ აჩვენა, რომ ჩრდილოეთ ამერიკაში ფუტკრების ერთ თაობაში პოპულაციის რაოდენობა 50%-ით შემცირდა, ხოლო ევროპაში 17%-ით.