დროას ლიდერმა, ელენე ხოშტარიამ განაცხადა, რომ პარტია წამოიწყებს "საზოგადოებრივი და პოლიტიკური საერთაშორისო მიმართვებს" საქართველოს NATO-სა და ევროკავშირში გაწევრიანების შესახებ. მისი თქმით, ქართული ოცნების მმართველობის პირობებში ქვეყნის საგარეო კურსზეც კი ვერ ხერხდება საზოგადოების კონსოლიდაცია.

"ჩვენ, დროა წამოვიწყებთ საერთო საზოგადოებრივი და პოლიტიკური საერთაშორისო მიმართვებს, სადაც კიდევ ერთხელ, მყარად გავუსვამთ ხაზს, რომ NATO და ზოგადად, ევროპა არის ჩვენი საზოგადოების მყარი არჩევანი და ვერავინ ამ არჩევანს ვერ შეცვლის.

ჩვენ ვხედავთ, რომ უკრაინა არის ძალიან აქტიური საერთაშორისო დღის წესრიგში მაშინ, როცა ჩვენი მოქალაქეების გატაცება საოკუპაციო ხაზებიდან აბსოლუტურად გამქრალია საერთაშორისო დღის წესრიგიდან. ამ დროს, სწორედ ეს არის ამ პრობლემატიკის ნაწილი", — განაცხადა ხოშტარიამ.

სპეციალურად გამართულ ბრიფინგზე, რომელიც საქართველოს საგარეო პოლიტიკურ კურსსა და უსაფრთხოებას შეეხებოდა, ხოშტარიამ ბოლო პერიოდში, რუსეთსა, ევროკავშირსა და NATO-ს შორის განვითარებულ მოვლენებზე ისაუბრა.

"ჩვენ ვნახეთ, რომ ხან უკრაინაში სამხედრო ესკალაციის მუქარით და ხან პირდაპირ ნატოს გადაწყვეტილებაზე თავდასხმით, რუსეთი დღეს ცდილობს ახალი ეტაპი წამოიწყოს ცივილიზებულ, ევროპულ, დემოკრატიულ მშვიდობის სივრცეზე და მათ უკარნახოს საკუთარი თამაშის წესები. ევროპა, რა თქმა უნდა, ძალიან მყარად და ერთიანად უპირისპირდება ამ საფრთხეს, თუმცა ჩვენ უნდა გვესმოდეს, რომ ამ საფრთხის და მუქარის პირდაპირი ადრესატი, უკრაინასთან ერთად, არის საქართველო [...]

გარდა ამისა, ჩვენ ვნახეთ, რომ რუსეთის საგარეო მინისტრის განცხადება არის პირდაპირი ჩარევა ჩვენი ქვეყნის შიდა საქმეებში. ტყუილების გზით საუბრობს, თითქოს ქართული საზოგადოება არის ნატოში ინტეგრაციის წინააღმდეგი. ეს არ არის ცალკე აღებული, შემთხვევითი განცხადებები. ეს არის მიზანმიმართული პოლიტიკა, რომლის ამოცანაც არის საქართველოს სუვერენიტეტის თავისუფალი არჩევანის და საქართველოს უსაფრთხოების ხელყოფა", — განაცხადა ელენე ხოშტარიამ.

11 დეკემბერს გავრცელდა რუსეთის საგარეო საქმეთა სამინისტროს განცხადება NATO-ს 2008 წლის ბუქარესტის შესახებ. სერგეი ლავროვის უწყება ითხოვს, გაუქმდეს საქართველოსა და უკრაინის ნატოში შესვლის დაპირება. გარდა ამისა, ოკუპანტი ქვეყანა ამერიკის შეერთებულ შტატებისა და ნატოსგან "უსაფრთხოების გარანტიებს" ითხოვს.

გარდა ამისა, ლავროვი აცხადებს, რომ საქართველოს ნატოში "ძალით შეყვანას" ცდილობენ და აღნიშნავს, რომ რუსეთისთვის ეს "წითელი ხაზის დარღვევა" იქნება. ამასთანავე ის იტყუება, თითქოს საქართველოს მოქალაქეების დიდ ნაწილს ეს არ სურს, რასაც არცერთი გამოკითხვა არ ადასტურებს. მეტიც, ავტორიტეტული საერთაშორისო ორგანიზაციების კვლევებით, უმრავლესობა ინტეგრაციის მომხრეა.

გაიგე მეტი: