მსახიობი ანდრო ჭიჭინაძე, რომელიც პროევროპულ აქციებზე დააკავეს, "ვისოლის" სარეკლამო კლიპში აღარ არის. სოციალურ ქსელში გავრცელებული ვიდეოდან ირკვევა, რომ პირვანდელ ვერსიაში მსახიობის ორი კადრი იყო, ხოლო ბოლო ვერსიაში, მხოლოდ მისი ხელი ჩანს.

bm.ge-ს ინფორმაციით, "ვისოლში" აცხადებენ, რომ კონტრაქტით კომპანიას მისი კადრების გამოყენების უფლება მხოლოდ გასული წლის ნოემბრის ბოლომდე ჰქონდა და მიზეზი პოლიტიკურ პროცესს არ უკავშირდება.

"მსახიობი ანდრო ჭიჭინაძე მონაწილეობდა “ვისოლის” ლოიალობის აპლიკაციის სარეკლამო კლიპში. რეკლამა სატელევიზიო ეთერში აპლიკაციის შემახსენებელი კომუნიკაციის ფარგლებში განმეორებით გავიდა 2024 წლის სექტემბრიდან, რაზეც მსახიობთან დავდეთ დამატებითი კონტრაქტი. ახალი შეთანხმების საფუძველზე მისი მონაწილეობით კადრის გამოყენების ნებართვა კომპანიას ჰქონდა 2024 წლის ნოემბრის ჩათვლით.

შესაბამისად, კომპანიამ მხოლოდ და მხოლოდ დაიცვა კონტრაქტით გათვალისწინებული პირობები და გავრცელებული ინფორმაცია, თითქოს მისი კადრის ამოჭრა შექმნილ პოლიტიკურ ვითარებასთან არის რაიმე სახით დაკავშირებული, არის სრული აბსურდი, მტკნარი სიცრუა და დეზინფორმაცია. აქვე ვაცხადებთ, რომ ჩვენი კომპანია მომავალშიც, ნებისმიერ დროს, სიამოვნებით ითანამშრომლებს მსახიობ ანდრო ჭიჭინაძესთან", — განუცხადეს bm.ge-ის კომპანიაში.

BM.ge წერს, რომ უცნობია, რატომ ვერ მოხერხდა კონტაქტის გაგრძელება დაპატიმრებამდე, რადგან, "ვისოლში" აცხადებენ, რომ ჭიჭინაძე კონტრაქტის შესაბამისად, კლიპში პირველი დეკემბრიდან აღარ არის. ცნობისთვის, მსახიობი 5 დეკემბერს დააკავეს.

მას ბრალად სისხლის სამართლის კოდექსის 225-ე მუხლის მეორე ნაწილით წარედგინა, რაც ჯგუფურ ძალადობაში მონაწილეობას გულისხმობს. მუხლი 4-დან 6 წლამდე თავისუფლების აღკვეთას ითვალისწინებს.

რეკლამამ, რომელშიც ანდრო ჭიჭინაძე აღარ ჩანს, უარყოფითი რეაქციები გამოიწვია, რადგან საზოგადოებამ მსახიობის ვიდეორგოლიდან ამოჭრაში პოლიტიკური მოტივები დაინახა. უკვე 1 თვეზე მეტია, რაც, როგორც ხელოვნების წრის გაფიცული წარმომადგენლები, ისე უწყვეტი საპროტესტო აქციების მონაწილეები ანდრო ჭიჭინაძის უკანონო პატიმრობას აპროტესტებენ და მის გათავისუფლებას მოითხოვენ.