რადიო თავისუფლების ცნობით, საქართველოს პროკურატურამ დაადასტურა მედიით გავრცელებული ინფორმაცია საქართველოს გენერალური პროკურორის მოადგილის, ნათია მერებაშვილის თანამდებობიდან გადადგომის შესახებ.

პროკურატურის პრესცენტრმა განუცხადა რადიო თავისუფლებას, რომ ნათია მერებაშვილმა ნამდვილად დატოვა დაკავებული პოსტი და რომ ის ახალ წლამდე დაემშვიდობა თანამშრომლებს.

"რაც შეეხება იმ მიზეზს, რაც მედიით ვრცელდება, ეს ყველაფერი არის სპეკულაცია", — განუცხადეს რადიო თავისუფლებას პროკურატურაში.

5 იანვარს მედიით გავრცელდა ინფორმაცია, რომ ნათია მერებაშვილმა თანამდებობის დატოვების მიზეზად "რეჟიმის ანტიდემოკრატიული და რეპრესიული პოლიტიკა" დაასახელა და თანამშრომლებთან დამშვიდობებისას თქვა, რომ ამ რეალობაში მუშაობას ვეღარ გააგრძელებდა.

ნათია მერებაშვილი გენერალური პროკურორის მოადგილის თანამდებობას 5 წლის განმავლობაში იკავებდა.

ნათია მერებაშვილმა რადიო თავისუფლებას განუცხადა, რომ მისი გადაწყვეტილება არ უკავშირდება მიმდინარე მოვლენებს.

"არ ვიმყოფები საქართველოში. ამ საკითხზე ვფიქრობდი გარკვეული პერიოდის განმავლობაში და დეკემბერში დავტოვე გენერალური პროკურორის მოადგილის თანამდებობა. ჩემი გადაწყვეტილება არ უკავშირდება მიმდინარე მოვლენებს და ვთხოვ ყველას, თავი შეიკავონ სხვადასხვა განმარტებისგან", — აცხადებს ნათია მერებაშვილი.