შსს-ს განსაკუთრებულ დავალებათა დეპარტამენტის ყოფილი მაღალჩინოსანი, ირაკლი შაიშმელაშვილი, რომელმაც უწყება 2024 წლის დეკემბრის დასაწყისში დატოვა, 22 დეკემბერს კი ქვეყნიდან წავიდა, "რადიო თავისუფლებასთან" ინტერვიუში ამბობს, რომ პროექტი, რომელიც ევროპის საბჭომ განახორციელა და რომელიც პოლიციის შესახებ და შეკრებისა და მანიფესტაციის შესახებ ორგანული კანონების შესწორების ვალდებულებას მოიცავდა, შს მინისტრის მოადგილემ, ალექსანდრე დარახველიძემ ჩააგდო.

"გიორგი გახარია რომ იყო მინისტრი, მაშინ აიღო შსს-მ ვალდებულება და ევროპის საბჭომ განახორციელა პროექტი — კანონი პოლიციის შესახებ, შეკრებისა და მანიფესტაციის შესახებ ორგანული კანონი რომ გაესწორებინათ, ჰარმონიზაციაში მოეყვანათ ევროკავშირის სტანდარტებთან. ეს პროცესი დაიწყო 2021 წელს. ამ პროცესში მეც ვიყავი ჩართული და ჩართული იყვნენ შსს-ს დეპარტამენტების დირექტორები.

შსს-მ ეს პროექტი ჩააგდო. გამოყოფილი თანხა, რომელიც ევროპის საბჭომ დახარჯა, ყველაფერი წყალში ჩაიყარა. არ შეიტანეს არანაირი ცვლილება, არ გააუმჯობესეს. არ მიიღეს იმიტომ, რომ არ აწყობთ. ეს რომ მიეღოთ, ვალდებულება უნდა აეღოთ. სტანდარტული სამოქმედო პროცედურებით რომ მუშაობდეს შსს, იმას არ მივიღებდით ქუჩებში, რაც დეკემბრის თვეში ვიხილეთ. როცა იდენტიფიცირებულია პოლიციელი, ის მოერიდება სხვა რაღაცების გაკეთებას. ეს ჩვენ შეგვზღუდავსო, პირად საუბრებში თქვეს. ეს პროექტი ჩააგდო მინისტრის მოადგილემ, რომელიც ამ საქმეს კურირებდა. ალექსანდრე დარახველიძემ, რომელიც კურირებს იურიდიულ პროცედურებს", — აცხადებს "რადიო თავისუფლებასთან" ინტერვიუში შსს-ს განსაკუთრებულ დავალებათა დეპარტამენტის ყოფილი მაღალჩინოსანი, ირაკლი შაიშმელაშვილი.

როგორც ინტერვიუდან გახდა ცნობილი, მან ოჯახთან ერთად ქვეყანა 23 დეკემბერს დატოვა, ფოტო აეროპორტიდან კი მოგვიანებით გამოაქვეყნა. ირაკლი შაიშმელაშვილი ამჟამად აშშ-ში იმყოფება და მზადაა გააგრძელოს რეჟიმის მხილება.

ირაკლი შაიშმელაშვილი ინტერვიუში ამბობს, რომ ჯერ კიდე შარშან ფიქრობდა სამსახურიდან წამოსვლაზე. სჯერა, რომ დიდხანს ყოფნა აქ, აშშ-ში არ მოუწვეს. "ბუნებრივია, ჩემი ბოლო გაჩერება საქართველო იქნება", — ამბობს ირაკლი შაიშმელაშვილი.