ოცნების ხელისუფლების წარმომადგენლები პატრიარქს დაბადების დღეს ულოცავენ.

"ოცნების" პრეზიდენტი მიხეილ ყაველაშვილი სოციალურ ქსელში საქართველოს პატრიარქს იუბილეს ულოცავს და მისი მოღვაწეობის მნიშვნელობაზე საუბრობს.

"ვულოცავ ჩვენს პატრიარქს, უწმინდესსა და უნეტარესს, ილია მეორეს იუბილეს.
თქვენო უწმინდესობავ, ფასდაუდებელია თქვენი ღვაწლი მართლმადიდებელი ეკლესიის და ქართული სახელმწიფოებრიობის განმტკიცებასა და აღორძინებაში.
სამაგალითოა თქვენი ცხოვრების გზა ქართველი ერისთვის, თითოეული ჩვენგანისთვის, განსაკუთრებით დღეს, როცა ქვეყნის გადარჩენის გზა ცდება პოლიტიკას და ხსნა სულიერებასა და სწორ ღირებულებებშია.
თქვენო უწმინდესობავ, თქვენ მაშინ აირჩიეთ ქრისტეს გზა, როცა ეკლესიას დევნიდნენ და თქვენი სიმტკიცით, რწმენით, სიმშვიდით და კაცთმოყვარეობით შეძელით ერში რწმენა და მადლი გაგემრავლებინათ.
თქვენი დაუღალავი მოღვაწეობა ქვეყნის და ეკლესიის წინაშე გვაძლევს ძალას, მყარად ვიდგეთ ჩვენი ქვეყნის ინტერესების სადარაჯოზე უფლის და თქვენი ლოცვის იმედით.
თქვენო უწმინდესობავ, გისურვებთ მხნეობას და დღეგრძელობას!
მჯერა, თქვენი ლოცვა შეგვეწევა ჩვენი ქვეყნის გამთლიანების გზაზე.", — წერს ყაველაშვილი.

მიხეილ ყაველაშვილის გარდა, პატრიარქს დაბადების დღეს ულოცავს "ოცნების" პარლამენტის თავმჯდომარე შალვა პაპუაშვილი. ის სოციალურ ქსელში მილოცვის ტექსტს აქვეყნებს, სადაც ნათქვამია, რომ ურთულეს პერიოდში ეკლესიას მშვიდი და ბრძენი მმართველი ჰყავს და მას დღეგრძელობას უსურვებს.

თანაპარტიელების მსგავსად, სოციალურ ქსელში პატრიარქის მილოცვას და მასთან გადაღებულ ფოტოს აქვეყნებს ირაკლი ღარიბაშვილიც.

პატრიარქს დაბადების დღე სოციალურ ქსელში "ოცნების" პარლამენტის წევრმა მამუკა მდინარაძემაც მიულოცა.

დღეს, 4 იანვარს, საქართველოს კათოლიკოს-პატრიარქი, ილია მეორე 92 წლის გახდა.