დეკანოზი შალვა კეკელიას თქმით, "პატიებას და შენდობას ითხოვს ყველა ადამიანის წინაშე", თუ მისი ქადაგება სიმართლეს არ შეესაბამებოდა.

ერთ-ერთი ქადაგების დროს კეკელიამ თქვა, რომ ჟურნალისტ ანა მამულაშვილს 2007 წელს, TV იმედის დარბევის დროს, თავში ხელკეტი ჩაარტყეს, რის გამოც, მას შემდეგ სიმსივნე გაუჩნდა.

"ანის [მამულაშვილი] გოგონას [მია გოგელაშვილი] ფეისბუქზე თქვენ პოსტი წამაკითხეთ და მინდა, მას გადავცე, რომ ის ძალიან მიყვარს, მისი ოჯახი ძალიან მიყვარს და ანი და გოგა ჩემი ბავშვობის მეგობრები არიან და სიგიჟემდე მიყვარს ეს ადამიანები და თუ რამე არასწორად გაიგეს, მე ამაზე პატიებას და შენდობას ვითხოვ. არ მინდა, თავის მართლების რეჟიმში ჩავდგე. მე ასე ვიცოდი, სამწუხაროდ, ეს ამბავი, რაც ჩემგან მოისმინეს, თუ ეს ასე არ არის, მე პატიებას და შენდობას ვითხოვ ყველა ადამიანის წინაშე". — თქვა დეკანოზმა TV პირველის ჟურნალისტთან საუბრისას.

4 იანვარს 2019 წელს გარდაცვლილი ჟურნალისტის, ანა მამულაშვილის შვილმა, მია გოგელაშვილმა სოციალურ ქსელში პოსტი გამოაქვეყნა და დეკანოზ შალვა კეკელია სიცრუეში დაადანაშაულა

გოგელაშვილის თქმით, დეკანოზმა ერთ-ერთი ქადაგების დროს, დედამისის გარდაცვალების ამბავი "თავის საკეთილდღეოდ" გამოიყენა და ამასთან დაკავშირებით, ტყუილი ილაპარაკა და მისივე თქმით, გამოგონილი ისტორია მოჰყვა.