გირჩი — მეტი თავისუფლების წევრის, ცოტნე კობერიძის განცხადებით, სამწუხაროა, რომ საკუთარი პოლიტიკური პოზიციის გამოსახატად, ადამიანებს საკუთარი თავის დაზიანება უწევთ. მისი თქმით, ქართული ოცნება იმდენად ამორალურია, რომ შესაძლოა, მოშიმშილე ადამიანების გამო არც "შეწუხდნენ".

"მე პირადად მინდოდა, რომ რაღაც სხვა გზები მოგვეფიქრებინა, სადაც ისინი შეწუხდებოდნენ ვიდრე ჩვენ. საკუთარი თავის ზიანით, არ ვიცი, ყურს თუ შეიბერტყს სისტემა, იმიტომ, რომ ქართული ოცნება იმდენად ამორალურია, აღარ ვიცი, შეწუხდება თუ არა მოშიმშილე ადამიანებით. თუმცაღა, ეს არის პირადი პასუხისმგებლობის საკითხი, როგორც ჩანს, ადამიანების დიდი ნაწილი მზად არის საკუთარი ჯანმრთელობა გარისკოს, იმისათვის, რომ საკუთარი პოლიტიკური პოზიცია დააფიქსიროს", — აცხადებს ის.

მისივე თქმით, თუ ამ აქცია-პერფორმანსში რამდენიმე ასეული ადამიანი მიიღებს მონაწილეობას, ქართულ ოცნებაზე წნეხი დიდი იქნება.

დღეს, 21 დეკემბერს ნაციონალური მოძრაობის მიერ მიხეილ სააკაშვილის მხარდასაჭერად გამართულ აქციაზე, ენმ-ის თავმჯდომარემ, ნიკა მელიამ მასობრივი შიმშილობის აქცია დააანონსა. მისი თქმით, შიმშილობა დაიწყება კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე. მელია ამბობს, რომ შიმშილობის აქცია იქნება უვადო და გაგრძელდება მანამ, სანამ ექსპრეზიდენტი არ გათავისუფლდება.