საქართველოს რეფორმების ასოციაციამ (GRASS) 2021 წლის თვითმმართველობის არჩევნების პირველ ტურამდე სოციალურ ქსელში საინფორმაციო სივრცის მონიტორინგი გამოაქვეყნა, რომლის თანახმად, მადისკრედიტირებელი კამპანიების სამიზნე ყველაზე მეტად ნაციონალური მოძრაობა გახდა. GRASS-ის ანგარიშის მიხედვით, თუკი სხვა ოპოზიციური პარტიების წინააღმდეგ გამოქვეყნებულ მასალებსაც გავაერთიანებთ, საერთო ჯამში, ოპოზიციის წინააღმდეგ მიმართული დისკრედიტაცია უფრო მასშტაბური იყო.

"დამონიტორინგებული მასალიდან, მადისკრედიტირებელი გზავნილების შემდეგ სამიზნეს ქართული ოცნება წარმოადგენდა. გარდა ამისა, მედია და სამოქალაქო ორგანიზაციები ასევე გახდნენ მავნე დისკრედიტაციის სამიზნეები", — ნათქვამია ანგარიშში.

GRASS-ის თანახმად, გამოიკვეთა შემდეგი მიგნებები:

• წინასაარჩევნო პერიოდში, დეზინფორმაციის გამოყენებით დისკრედიტაციის კამპანია, ერთი მხრივ, რადიკალიზაციისა და პოლარიზაციის ხარისხის გაზრდას უწყობდა ხელს, მეორე მხრივ, საზოგადოებაში ჯანსაღი დებატებისა და მსჯელობის განვითარების საშუალებას მკვეთრად ზღუდავდა. მსგავსი ნეგატიური კამპანიები კი მოსახლეობის რეალურ პრობლემებს ჩრდილავდა და არაჯანსაღ საარჩევნო გარემოს ქმნიდა;
• წინასაარჩევნო პერიოდში გამოვლენილი დეზინფორმაციის უმრავლესობა ეხებოდა ქართული ოცნების მიერ ევროკავშირის სესხზე "უარის თქმის" საკითხს. პოლიტიკური ლიდერებისა თუ კანდიდატების შესახებ გავრცელებული დეზინფორმაცია უმრავლეს შემთხვევაში გაყალებებული ციტატების ფორმით გავრცელდა. მცდარი ინფორმაცია ასევე გავრცელდა ცენტრალური საარჩევნო კომისიის შესახებ. ამასთან, საარჩევნო დღის მიწურულს, 2 ოქტომბერს, სოციალურ ქსელში ფოტოების სახით კვლევითი ორგანიზაციების მიერ არჩევნების წინასწარი შედეგების ყალბი მასალები გამოქვეყნდა;
• წინასაარჩევნო პერიოდში ცალკეული პრორუსული თუ ანტიდასავლური აქტორის მხრიდან გავრცელებულ დეზინფორმაციაზე მეტად საგანგაშო მმართველი გუნდის წარმომადგენლების მიერ ღიად გაკეთებული ანტიდასავლური განცხადებები იყო, რაც, ბუნებრივია, გრძელვადიან პერიოდში საქართველოს ევროპულ და ევროატლანტიკურ მისწრაფებებს და ამ კუთხით, საზოგადოებრივ განწყობებს აზიანებს.

გარდა ამისა, კვლევაში კონკრეტული მაგალითებით არის აღწერილი წინასაარჩევნო პერიოდში დისკრედიტაციის კამპანიები შემდეგი მიმართულებებით:

• დისკრედიტაციის კამპანია ერთიანი ნაციონალური მოძრაობის საწინააღმდეგოდ;
• დისკრედიტაციის კამპანია ქართული ოცნების საწინააღმდეგოდ;
• დისკრედიტაციის კამპანია გიორგი გახარიასა და პარტია საქართველოსთვის წინააღმდეგ;
• დისკრედიტაციის კამპანია სხვა ოპოზიციური პარტიების წინააღმდეგ;
• დისკრედიტაციის კამპანია მედიის წინააღმდეგ;
• დისკრედიტაციის კამპანია არასამთავრობო ორგანიზაციების წინააღმდეგ.

სოციალური ქსელის მონიტორინგი მოიცავდა 300-მდე Facebook-ანგარიშს, რომლებიც წინასაარჩევნო პერიოდში ცალკეული პოლიტიკური სუბიექტების სასარგებლოდ და/ან საწინააღმდეგოდ საინფორმაციო მანიპულაციების გავრცელებით გამოირჩეოდნენ.

"როგორც წესი, დამონიტორინგებული გვერდების უმრავლესობა ანონიმურად მოქმედებდა და რიგითი Facebook-მომხმარებლისთვის მათ უკან მდგომი ადამიანების ვინაობა და მიზნები ცალსახა არ იყო", — აღნიშნავენ არასამთავრობო ორგანიზაციაში.

GRASS-ის განცხადებით, მონიროტინგი პირველი სექტემბრიდან 2 ოქტომბრამდე პერიოდში განხორციელდა, რომლის დროსაც შეირჩა და გაანალიზდა 425 Facebook-პროდუქტი (მათ შორის სტატია, ფოტო/ვიდეო, ტექსტური პოსტი). სოციალურ ქსელში შერჩეული გვერდების მონიტორინგი ხდებოდა Facebook-ის ანალიტიკური ხელსაწყოს, CrowdTangle-ის მეშვეობით.

ანგარიშის სრული ვერსიის სანახავად გადადით ბმულზე.