ვაზისუბნის დასახლებაში აფეთქების შედეგად 5 ადამიანი დაშავდა. გამგებლის, ნიკა ელისაშვილის ინფორმაციით, ერთ-ერთმა პირმა მიიღო დამწვრობა და მისი მდგომარეობა მძიმეა, ოთხს კი ინტოქსიკაცია აქვს.

"ჩვენი ინფორმაციით, მოხდა გაზის გაჟონვა. გაზის გაჟონვის შედეგად მოხდა აფეთქება. სხეულის დაზიანება მიიღო 5-მა ადამიანმა, ყველა გადაყვანილია შესაბამის კლინიკებში. ადგილზე მობილიზებულია ყველა შესაბამისი სამსახური. ამ ეტაპზე ხანძარი ლიკვიდირებულია და მიმდინარეობს სხვადასხვა სამუშაო იმის დასადგენად, თუ რამ გამოიწვია ხანძარი და აფეთქება", — აცხადებს ნიკა ელისაშვილი.

საგანგებო სიტუაციების წარმომადგენლის განცხადებით, აფეთქება გაზის დაგროვების შედეგად მოხდა.

"ვაზისუბნის დასახლებაში, მე-15 კორპუსში, პირველ სართულზე, ბუნებრივი აირის დაგროვების შედეგად მოხდა აფეთქება, რამაც გამოიწვია ხანძარი. შემთხვევის ადგილზე ოპერატიულად გამოცხადდნენ სახანძრო-სამაშველო ჯგუფები. ამ დროისთვის ხანძარი სრულიად ლიკვიდირებულია", — თქვა უწყების წარმომადგენელმა და აღნიშნა, რომ ადგილზე უსაფრთხოების შესაბამისი სამსახურები შეაფასებენ.

ვაზისუბნის დასახლებაში აფეთქების შესახებ ინფორმაცია 19 დეკემბერს, დაახლოებით 22:00 საათზე გავრცელდა.