გახსოვთ TRAPPIST-1, იქ აღმოჩენილი 7 ახალი პლანეტა და ჩვენი ანუ მთელი დედამიწის აღფრთოვანება? თუ არა, მაშინ ეს სტატია გადაიკითხეთ: ყველაფერი, რაც NASA-ს ახალი აღმოჩენისა და მისი მნიშვნელობის შესახებ უნდა იცოდეთ.

"თუ სადმე სიცოცხლის მოძებნა გვინდა, ეს სისტემა დღესდღეობით საუკეთესო ვარიანტია“- ამბობდა შვეიცარიელი პროფესორი ბრაის-ოლივერ დიმორი. მისი ეს განცხადება კი ახალი კვლევით ეჭვქვეშ უნგრელმა ასტრონომებმა დააყენეს.

TRAPPIST-1-ის გარშემო მბრუნავ დედამიწის მსგავს 3 ეგზოპლანეტაზე სიცოცხლე მხოლოდ იმ შემთხვევაში შეიძლება არსებობდეს, თუ ამ პლანეტებს საოცრად გამძლე მაგნიტოსფეროები აქვთ.

უნგრეთის კონკოლის ობსერვატორიის მეცნიერებმა, კრისტიან ვაიდას ხელმძღვანელობით, 80 დღის განმავლობაში TRAPPIST-1-ზე 42 მაღალი სიმძლავრის აფეთქება დააფიქსირეს. აქედან 5 აფეთქება მულტიპიკური იყო ანუ ერთ აფეთქებაზე პლაზმის რამდენიმე ტალღის გასროლა მოხდა. ამ აფეთქებებიდან ყველაზე მძლავრი, რომელიც ასტრონომებმა დააფიქსირეს, დაახლოებით იმავე სიმძლავრის იყო, რაც მზის ჩვენთვის ნაცნობი ყველაზე მძლავრი აფეთქება, ე.წ. ქერინგთონის მოვლენა, რომელიც 1859 წელს დაფიქსირდა. იგივე რომ ახლაც განმეორდეს დედამიწაზე არსებული საკომუნიკაციო სისტემები მთლიანად განადგურდება.

მაგრამ თუ ამ სიმძლავრის მოვლენას დედამიწაზე სიცოცხლის განადგურება არ შეუძლია, რატომ არის საშიში ის TRAPPIST-1-ის გარშემო მბრუნავი პლანეტებისთვის?

პირველ რიგში უნდა გავითვალისწინოთ ის, რომ პლანეტები ვარსკვლავთან ძალიან ახლოს ბრუნავენ. რასაც ემატება ის, რომ მაღალი სიმძლავრის აფეთქებებს შორის პერიოდი სულ რაღაც 28 საათია, რაც ატმოსფეროს სტაბილურობის აღსადგენად საკმარისი არ არის. უფრო მეტიც, ერთ-ერთი კვლევის მიხედვით, ერთი ასეთი მოვლენის შემდეგ ატმოსფეროს დასტაბილურებას 30 ათასი წელი მაინც დასჭირდება. ამ ფაქტორების გათვალისწინებით, უნდა დავასკვნათ, რომ აღნიშნულ პლანეტებზე სიცოცხლის ყველაზე პრიმიტიული ფორმაც კი ვერ იარსებებს.

მაგრამ მიუხედავად ამისა, ჩვენ მაინც შეგვიძლია გვიყვარდეს ისინი. ბოლოს და ბოლოს, ნახეთ, რა საყვარლები არიან:

ფოტო: Google