პროფკავშირების ოფისთან მაღაროელებმა აქცია გამართეს. მაღაროელ ტარიელ მიქაცაძის თქმით, ამ დანაშაულში, რაც ჭიათურაში ხდება დამნაშავეები არიან გაერთიანებული პროფკავშირებიც იმიტომ, რომ მათი გულგრილობის შედეგადაა ყველაფერი, რაც სჭირს დღეს ჭიათურას.

"არარეალური კოლექტიური შეთანხმება, თუკი რამე გაგვჭირვებია, ყველაფერი ჩვენი ბრძოლით მოგვიპოვებია დაზარალებულ დასაქმებულებს. მხოლოდ და მხოლოდ გვეუბნებიან, რომ თქვენ პროვოკაციულ აქციებს აწყობთო. ჩაბრძანდნენ ჭიათურაში, შუშებიდან რომ იყურებიან. სამი თვეა, ხალხი მშიერია. ბანკები ახრჩობს ხალხს და ამ დროს ესენი ბლოკპოსტებს ამაგრებენ, რომ იქ არ შევუხტეთ", – განაცხადა ტარიელ მიქაცაძემ.

გაერთიანებული პროფკავშირებით შენობასთან დაპირისპირება მას შემდეგ მოხდა, რაც ადგილზე პროფკავშირების გაერთიანების თავმჯდომარე ირაკლი პეტრიაშვილი და პროფკავშირების სხვა წარმომადგენლები მივიდნენ.

ირაკლი პეტრიაშვილმა მაღაროელებს მოუწოდა, რომ "თავი დაანებონ პროვოკაციებს". მაღაროელების გაღიზიანება სწორედ ამ სიტყვამ გამოიწვია.

"ჩვენ არ ვართ პროვოკატორები. ჩვენ შსს-სთან შევათანხმეთ, ვიცით, სად უნდა დავდგეთ, მაგრამ ეცადნენ, გამოვსულიყავით მდგომარეობიდან, ისეთი სიტყვიერი შეურაცხყოფა მოგვაყენეს და და ფიზიკური გაწევებიც ჩაიდინეს. ესენი არიან ბანდიტები, ესენი არიან დაჯგუფებები და ვთხოვ ყველას, ვინც ამათი წევრია დღეს, დატოვონ გაერთიანება.

ესენი არ არიან საქართველოს მშრომელი ხალხის სახე. და კიდევ ერთხელ მინდა, მოვუწოდო, რომ არავითარ იმ სამმხრივ კომისიურ შეხვედრებში, რომელიც პეტრიაშვილმა თავისი თავი წარმოადგინა ჩვენს დამცველად მთავრობის და კომპანიის წინაშე, სრულ უნდობლობას ვუცხადებთ, მაგრამ ვერ გავდივართ ჯერ კოლექტიური შეთანხმებიდან, ისეთი უსინდისო წესები აქვთ კოლექტიურში, გავალთ თუ არა, ყველაფერს ვკარგავთ ჩვენი ბრძოლით მოპოვებულს, ამიტომ ესენი არიან ნაძირლები", — ამბობს ტარიელ მიქაცაძე (კომენტარებს პუბლიკა ავრცელებს).

ჭიათურელი მაღაროელები თბილისში 24 მარტს ჩამოვიდნენ და საპროტესტო აქცია მთავრობის კანცელარიასთან გამართეს .

7 მარტს ცნობილი გახდა, რომ ჭიათურა მენეჯმენტ კომპანიამ, ჯორჯიან მანგანეზთან შეთანხმებით, მიიღო გადაწყვეტილება, რომ ჭიათურაში მიწისქვეშა სამუშაოებს აღარ განაახლებს. მას შემდეგ, ჭიათურის მოსახლეობა უკვე 25-ე დღეა აქციებს მართავს.

მაღაროელ ტარიელ მიქაცაძეს განცხადებით მათ ჩამოაყალიბეს მოთხოვნები და სამოქმედო გეგმა, თუ როგორ შეძლებდნენ მთავრობასთან ერთად ამ პრობლემის გადაჭრას, მაგრამ მათ გამოხმაურება არ მიუღიათ.

მაღაროელების მოთხოვნები შემდეგია:

• ჯორჯიან მანგანეზმა ხელფასი 3 თვის დავალიანების მაღაროელებს დაურიცხოს;

• მთავრობა შეხვდეს პროტესტის მონაწილე მაღაროელებს;

• ჯორჯიან მანგანეზმა სრულად დატოვოს ჭიათურა და მთავრობამ გადაიბაროს პასუხისმგებლობა;

• მთავრობა დასხდეს მოლაპარაკების მაგიდასთან ჭიათურელ ხალხთან ერთად და სამომავლო გეგმებზე იმსჯელონ.

ტარიელ მიქაცაძემ ასევე დასძინა, რომ მოთხოვნების დაუკმაყოფილებლობის შემთხვევაში ისინი პროტესტს ჭიათურასა და თბილისში გააგრძელებენ და "არ მისცემენ არავის იმის უფლებას, რომ ჭიათურაში ხალხი შიმშილობდეს და აქ უბრალოდ მთავრობის და კომპანიის წარმომადგენლები კაბინეტებში ისხდნენ და კომფორტულად გრძნობდნენ თავს".