საქართველოს ბანკის ციფრული საბანკო ეკოსისტემის სამსახურის უფროსმა, გიორგი კინწურაშვილმა ევროპაში ერთ-ერთ ყველაზე მასშტაბურ ღონისძიება — MoneyLive Summit London-ში მიიღო მონაწილეობა. ღონისძიებაზე მან ციფრული საბანკო მომსახურების შესახებ ისაუბრა.

MoneyLive Summit London ევროპაში ერთ-ერთი ყველაზე პრესტიჟული ღონისძიებაა ციფრული საბანკო მომსახურების სფეროში, სადაც C-level ხელმძღვანელები მონაწილეობენ. შეხვედრაზე სფეროს პროფესიონალები მიმდინარე გამოწვევებსა და მომავალ ტრენდებს განიხილავენ.

ღონისძიებას მსოფლიოს სხვადასხვა ქვეყნიდან 200-ზე მეტი სპიკერი და 1500-ზე მეტი მოწვეული სტუმარი ესწრებოდა. მათ შორის ისეთი ევროპული და ბრიტანული ბანკების წარმომადგენლები, როგორებიცაა: Barclays, NatWest, Goldman Sachs, JPMorgan, BNP Paribas და HSBC. სამიტში ასევე მონაწილეობდნენ ისეთი ციფრული ბანკების ხელმძღვანელები, როგორებიცაა: Revolut, Bunq, Tandem-ის და სხვ.

“მოხარული ვარ, რომ საქართველოს ბანკის სახელით სპიკერი ვიყავი ისეთი ღონისძიების, როგორიც MoneyLive Summit London-ია. პანელური დისკუსიის ფორმატში, Goldman Sachs და NatWest-ის წარმომადგენლებთან ერთად შესაძლებლობა მქონდა მესაუბრა საქართველოს ბანკის წარმატებულ ქეისზე, საერთაშორისო აუდიტორიისთვის გამეცნო საკუთარი ხედვები ღია ბანკინგის მიმართულებით. ღონისძიებაზე ასევე ვისაუბრე ბანკში ციფრული ეკოსისტემის მიმართულებით დანერგილი ინოვაციებისა და სამომავლო სტრატეგიის შესახებ, კერძოდ კი: ტრანზაქციული ანალიტიკის, Ads Manager-ისა და ლოიალურობის პროგრამების შესახებ. მსგავსი ღონისძიებები ძალიან მნიშვნელოვანია, რადგან ერთი მხრივ, შესაძლებლობას გვაძლევს ჩვენი ინოვაციური მიდგომები და პროდუქტები გავაცნოთ საერთაშორისო აუდიტორიას, მეორე მხრივ, კი წამყვანი საერთაშორისო საბანკო ინსტიტუტების გამოცდილება გავიზიაროთ. ჩვენ არ ვჩერდებით და ვაგრძელებთ სფეროს განვითარებაზე ზრუნვას, როგორც კომპანიის შიგნით, ისე მთელი ქვეყანის მასშტაბით“, - განაცხადა გიორგი კინწურაშვილმა, საქართველოს ბანკის ციფრული ეკოსისტემის სამსახურის უფროსმა.