ნაციონალური მოძრაობის ხელისუფლების საქმიანობის შემსწავლელი პარლამენტის დროებით საგამოძიებო კომისიის თავმჯდომარემ, თეა წულუკიანმა დღევანდელ სხდომაზე განაცხადა, რომ საქართველოს მესამე პრეზიდენტის, მიხეილ სააკაშვილის დაბარებაც იგეგმება.

წულუკიანის განცხადებით, სააკაშვილი თავად უპასუხებს იმ კითხვებს, რაც მასთან დაკავშირებით კომისიას აქვს.

"იმაზე ნუ დაიფიცებთ, რომ სააკაშვილს ეს თავში არ მოსვლია. მას რომ მოვიწვევთ, თუ მოვიწვევთ და იმედია მოვიწვევთ, მობრძანდება, მას ვკითხავთ, რა თქმა უნდა", — აღნიშნა თეა წულუკიანმა.

ცნობისთვის, თეა წულუკიანმა საგარეო საქმეთა ყოფილ მინისტრ გრიგოლ ვაშაძის განცხადებას უპასუხა, სადაც ვაშაძე ამბობს, რომ "არასდროს არავის პრეზიდენტიდან დაწყებული ატაშემდე დამთავრებული, თავში არ მოსვლია იდიოტური აზრი — ქვეყნის სუვერენიტეტის ნაწილი ვინმესთვის დაეთმო".

შეგახსენებთ, 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისიის მეხუთე სხდომაზე 2004-2008 წლებში საქართველოს ოკუპირებულ ტერიტორიებზე შექმნილი ვითარება და 2008 წლის აგვისტოს ომი განიხილება. სხდომაზე უკვე მოუსმინეს პაატა დავითაიას, გრიგოლ ვაშაძესა და მიხეილ ქარელს. მოწვეულები არიან ასევე: ირაკლი ოქრუაშვილი, თამაზ ბესტაევი და ზურაბ ნოღაიდელი.

სხდომაზე არ გამოცხადება, თეა წულუკიანის განცხადებით, სისხლს სამართლის დანაშაულია და 1 წლამდე პატიმრობას ითვალისწინებს.

თეა წულუკიანმა ძლიერი საქართველოს ლიდერების, ბადრი ჯაფარიძის და მამუკა ხაზარაძის ენმ-ს ხელისუფლების საქმიანობის შემსწავლელის სხდომაზე არ გამოცხადება პროკურატურას გადასცა. გენერალურმა პროკურატურამ, მამუკა ხაზარაძესთან დაკავშირებით გამოძიება "სისხლის სამართლის კოდექსის" 349-ე მუხლით დაიწყო. მამუკა ხაზარაძე და ბადრი ჯაფარიძე 25 მარტის კომისიის სხდომაზე შპს "მაგნატის" საქმის განხილვაზე იყვნენ დაბარებულნი.