NATO-ს გენერალურმა მდივანმა, მარკ რუტემ პოლონეთში ვიზიტისას განაცხადა, რომ ალიანსი "გამანადგურებელი" დარტყმით უპასუხებს რუსეთის მიერ პოლონეთსა ან სხვა მოკავშირეზე თავდასხმას.

"თუ ვინმე არასწორად თვლის და ფიქრობს, რომ შეუძლია პოლონეთზე ან სხვა მოკავშირეზე თავდასხმის შემდეგ დაუსჯელი დარჩეს, მას ამ მრისხანე ალიანსის მთელი ძალა დახვდება," — განაცხადა მარკ რუტემ ვარშავაში ვიზიტისას ჟურნალისტებთან.

რუტემ ასევე დასძინა, რომ რუსეთის თავდასხმის შემთხვევაში NATO-ს რეაქცია რუსეთისთვის გამანადგურებელი იქნება.

"ჩვენი რეაქცია იქნება გამანადგურებელი. ეს უნდა იყოს ძალიან ნათელი ვლადიმერ პუტინისთვის და ყველასთვის, ვისაც ჩვენზე თავდასხმა სურს", — განაცხადა გენერალურმა მდივანმა პოლონეთის პრემიერმინისტრ დონალდ ტუსკთან ერთობლივ პრესკონფერენციაზე.

დონალდ ტუსკმა აღნიშნა, რომ "როდესაც გეოპოლიტიკური ვითარება ჩვენს თვალწინ იცვლება, ეს ადასტურებს, რომ NATO ვალდებულია პოლონეთი ყველა კრიტიკულ სიტუაციაში დაიცვას".