გირჩის ერთ-ერთი ლიდერი, ალექსანდრე რაქვიაშვილი აცხადებს, რომ 2%-იანზე უფრო მაღალ საარჩევნო ბარიერის პარტია მხარს არ დაუჭერს. ის ამბობს, რომ საკონსტიტუციო რეფორმებზე მსჯელობა პარლამენტში უნდა მიმდინარეობდეს და გადაწყვეტილებას შესაბამისი განხილვების შემდეგ მიიღებენ.

"მხარს ვუჭერთ 2%-იან ბარიერს და არ დავუჭერთ [მხარს] არანაირ უფრო მაღალ ბარიერს. კონკრეტული ფორმულირება როგორ იქნება, სიტყვების თამაში იქნება ეს თუ მნიშვნელოვანი ცვლილება, ამის მიხევდით მივიღებთ უკვე საბოლოო გადაწყვეტილებას. მთავარია, რომ ბარიერი იყოს დაბალი, შემდეგი არჩევნები ჩატარდეს დაბალი ბარიერით [...]

საკონსტიტუციო ცვლილებებზე დისკუსია პარლამენტში უნდა მიმდინარეობდეს. ზოგადად, მე იმედი მაქვს, რომ ჩვენ ნორმალური, საქმიანი საუბრები გვექნება, იმიტომ, რომ ამ მომენტში ეს [საარჩევნო ბარიერი] ისევ პოლიტიკური ვაჭრობის საგანი გახდა", — განაცხადა რაქვიაშვილმა.

30 ნოემბერს, ქართული ოცნების თავმჯდომარემ, ირაკლი კობახიძემ განაცხადა, რომ საკონსტიტუციო ცვლილებათა კანონპროექტის ფარგლებში საარჩევნო ბარიერის დაწევა მმართველი პარტიის "კეთილ ნებაზე იქნება დამოკიდებული". შეგახსენებთ, რომ საარჩევნო ბარიერის დაწევა შარლ მიშელის შეთანხმების ნაწილი იყო. აღსანიშნავია ისიც, რომ საკონსტიტუციო ცვლილებებს, სადაც განსაზღვრული იყო, რომ საარჩევნო ბარიერი 0-სა და 2%-ს შორის უნდა ყოფილიყო პარლამენტმა, მათ შორის ქართულმა ოცნებამ პირველი მოსმენით მხარი ჯერ კიდევ 7 სექტემბერს დაუჭირა.

კობახიძის ამ განცხადებას გამოხმაურებები მოჰყვა როგორც ოპოზიციისგან, ისე არასამთავრობო სექტორისა და საერთაშორისო პარტნიორებისგან. მაგალითად, ნაციონალური მოძრაობის ერთ-ერთმა ლიდერმა, ხატია დეკანოიძემ განაცხადა, რომ კობახიძემ ამით მორიგი "გადაგდება" დააანონსა. ლელოს გენერალურმა მდივანმა, ბადრი ჯაფარიძემ კი თქვა, რომ მნიშვნელოვანია ამ განცხადებას წინააღმდეგობა შეხვდეს.

კობახიძიეს გამოეხმაურა საქართველოში აშშ-ს ელჩი კელი დეგნანიც. მან თქვა, რომ ერთი აზრის დომინირება დემოკრატიას რისკის ქვეშ აყენებს და ეს "ზოგიერთს, ალბათ, არ ესმის". დეგნანის საპასუხოდ, კობახიძემ განაცხადა, რომ თავად არის კონსტიტუციური სამართლის სპეციალისტი, აშშ-ს ელჩი კი არა, რაზეც დეგნანმა უპასუხა, რომ საკონსტიტუციო სამართალში გამოცდილება მასაც აქვს. საქართველოში აშშ-ს ყოფილმა ელჩმა, იან კელიმ კობახიძეს მოუწოდა, თავი დაანებოს კელი დეგნანის მანდატსა და რეპუტაციას, რადგან ამ ბრძოლას ყოველთვის წააგებს.

გაიგე მეტი: