თბილისის მერის, კახა კალაძის განცხადებით, საახალწლო ბიუჯეტი თბილისში დაგეგმილი სადღესასწაულო ღონისძიების მასშტაბით განისაზღვრება. მის კომენტარს თბილისის მერია ავრცელებს.

"შარშან, საერთოდ არ გვქონდა საახალწლო სოფელი, არსებული პანდემიიდან გამომდინარე, რადგან ძალიან მძიმე მდგომარეობა იყო. შარშანწინ კიდევ უფრო განსხვავებული რეალობა იყო. შესაბამისად, ბიუჯეტი წლების მიხედვით განსხვავებულია. შარშან ნაკლები იყო, შარშანწინ ცოტა მეტი იყო, წელს შარშანდელზე მეტია და ასე შემდეგ", — განაცხადა მან.

როგორც განცხადებაშია აღნიშნული, კალაძემ, ასევე, ისაუბრა, რატომ ვერ ცხადდება ტენდერი საახალწლო ღონისძიებების შესყიდვებზე.

"თუ თქვენ მეტყვით და მირჩევთ, რანაირად შეიძლება მაგალითად, მომღერლები ტენდერის საფუძველზე შევარჩიოთ, უდიდეს მადლობას გადაგიხდით. რა უნდა იყოს ტენდერის პირობები, რის მიხედვით შევარჩიოთ, პირველი თუ მეორე ხმის მიხედვით?", — აღნიშნავს ის.