ქართული ოცნების თავმჯდომარის, ირაკლი კობახიძის განხცადებით, ერთადერთი, რისგანაც უნდა გათავისუფლდეს მედია, სიძულვილია. ამით ის ლელოს ინიციატივას გამოეხმაურა, სადაც მიაჩნიათ, რომ თამაშებზე რეკლამის შეზღუდვების გამო მედიები უნდა გათავისუფლდნენ გადასახადებისგან.

"ეს არის მორიგი სპეკულაცია და ერთადერთი რისგანაც სასურველია, გათავისუფლდეს მედია, ეს არის სიძულვილი. ვუსურვებ ყველა მედიასაშუალებას, რომ მაქსიმალურად სიძულვილისგან გათავისუფლდეს", — ამბობს კობახიძე.

პარტია ლელო ხელისუფლებას მოუწოდებს მედიაზე არსებული საგადასახადო წნეხი შეარბილოს და სულ მცირე სამი წლის განმავლობაში მედია ბიზნესი გადასახადებისგან სრულად გაათავისუფლოს.

29 ნოემბერს პრემიერმინისტრმა, ირაკლი ღარიბაშვილმა განაცხადა, რომ სათამაშო ბიზნესის ყველანაირი რეკლამა აიკრძალება. მათ შორის, სატელევიზიო, გარე და ქართულ ვებ-გვერდებზე განთავსებული რეკლამა. ღარიბაშვილის თქმით, სათამაშო ბიზნესოპერატორებისთვის მხოლოდ სპონსორობის ხელშეკრულების გაფორმება იქნება დასაშვები.

მან, ასევე, თქვა, რომ აზარტულ თამაშებში მონაწილეობის მიღება 25 წლამდე საქართველოს მოქალაქეებს აეკრძალებთ. რაც შეეხება მოსახლეობის კატეგორიას, ღარიბაშვილის თქმით, კაზინოებში ვერ ითამაშებენ:

  • სოციალურად დაუცველი პირები, რომლებიც დახმარებას იღებენ სახელმწიფოსგან;
  • საჯარო მოხელეები — პირები, რომლებიც მიმართავენ შემოსავლების სამსახურს თვითშეზღუდვის გამოყენების მოთხოვნით და ასევე, პირები, რომლებიც მოხვდებიან ე.წ. შავ სიაში, სასამართლო გადაწყვეტილების საფუძველზე ოჯახის წევრების მოთხოვნით.

გაიგე მეტი: