საზოგადოებრივი მაუწყებლის პირველი არხის კახეთის ბიუროს ჟურნალისტი რომან ქევხიშვილი ფეისბუკის პირად გვერდზე საჯაროდ წერს, რომ საზოგადოებრივი მაუწყებლის ხელმძღვანელობამ კონტრაქტი არ გაუგრძელა:

"უკვე მეორედ გამომაგდეს საზოგადოებრივი მაუწყებლიდან - ორივეჯერ ზემოდან დავალებით. მთელი სახელმწიფო მანქანა იყო ჩართული და პირნათლად შეასრულეს "ქართული ოცნების" აქტივისტებმა დავალება, რომლებიც ტელევიზიის მაღალ პოზიციებზე მხოლოდ იმიტომ არიან, რომ "საკუთარი კალამით" წავიდნენ არჩევნებზე. იმედია შეტყობინებასთან ერთად, უახლოეს პერიოდში მივეღებ დასაბუთებულ წერილს, რა გახდა ხელშეკრულების არ გაგრძელების საფუძველი?".

როგორც რომან ქევხიშვილმა On.ge-ს განუცხადა, მას არანაირი განმარტება არ მიუღია ხელშეკრულების არგაგრძელებასთან დაკავშირებით. მან პირად გვერდზე გამოაქვეყნა საზოგადოებრივი მაუწყებლიდან მიღებული შეტყობინება.

რომან ქევხიშვილის თქმით, ის საზოგადოებრივ მაუწყებელში 2012 წლის 1 სექტემბრიდან მუშაობს, პირველად სამსახურიდან გაათავისუფლეს 2013 წლის 31 დეკემბერს, რის შემდეგაც, 2014 წლის 19 მაისს ისევ დაბრუნდა ტელეარხში სამუშაოდ.

რამდენიმე დღის წინ რომან ქევხიშვილს საზოგადოებრივმა მაუწყებელმა საყვედური ოფიციალურად გამოუცხადა მიმდინარე წლის მარტში ფეისბუკზე ლალი მოროშკინას მიმართ დაწერილი უცენზურო სიტყვების გამო.

ჩვენ ვცდილობთ მაუწყებლის მენეჯმენტთან დაკავშირებას და მათ განმარტებას მოგვიანებით შემოგთავაზებთ.