სალომე სამადაშვილის განცხადებით, როდესაც ქართული ოცნების თავმჯდომარეს, ირაკლი კობახიძეს უსმენს, ჰგონია, რომ მას განათლება გერმანიაში აქვს მიღებული, მესამე რაიხის პერიოდში. მისივე თქმით, ეს აზრი დემოკრატიაზე კობახიძის "უცნაური წარმოდგენების" გამო ჩნდება.

"ბატონ კობახიძეს რომ ვუსმენ, რომელსაც ხშირად მოაქვს თავი საკუთარი განათლებით ევროპაში, მგონია, რომ გერმანიაში აქვს განათლება მიღებული, მაგრამ დაახლოებით 1933-დან 1945 წლამდე ისტორიულ პერიოდში, მესამე რეიხის დროს. ისეთი უცნაური წარმოდგენა აქვს ამ ევროპაში განათლებულ ადამიანს, იმაზე რა არის თანამედროვე ევროპული დემოკრატიული ცივილიზაცია", — თქვა სამადაშვილმა პარლამენტში.

მისივე თქმით, კობახიძეს ჰგონია, რომ საპყრობილეში "ყოფილი პრეზიდენტის თრევა", ევროპული საბჭოს პრეზიდენტის შეთანხმების დოკუმენტის "უკან მიგდება", სახალხო დამცველის "ნაციონალურ მოძრაობის სატელიტად" მოხსენიება და ა.შ, ევროპული საქციელია.

ირაკლი კობახიძემ დღეს პარლამენტის პლენარულ სხდომაზე განაცხადა, რომ ქართული საზოგადოება "ევროპული ყაიდისაა" რომლისთვისაც წინა ხელისუფლების ქმედებები მიუღებელია და ახალ სისტემას იმსახურებს. კობახიძის მტკიცებით, ასეთი სისტემა 2012 წლის შემდეგ ჩამოყალიბდა.