Shark Tank-ის მორიგი გამარჯვებულებისთვის იდეის მთავარი ინსპირაცია კრისტოფერ ნოლანის ფილმი Inception გახდა. რამდენიმე წლის წინ, როდესაც ბაღის სამმა მეგობარმა ლეონარდო დიკაპრიოს შესრულებით ერთ-ერთი კინო შედევრი ნახა, სიზმრების კონტროლის მოწყობილობის შექმნა გადაწყვიტა. აქედან დაიწყო 3 მეგობრის გუნდის ისტორია, რომელიც ექიმს, ინჟინერსა და პროგრამისტს აერთიანებს.

"თავდაპირველად სიზმრების მართვის აპარატზე დავიწყეთ მუშაობა, თუმცა რამდენიმე თვის შემდეგ აშშ-ში გოგონების გუნდმა საკმაოდ დახვეწილი მოწყობილობა შექმნა და ჩვენც ხელი ჩავიქნიეთ. შემდეგ ხელის და ფეხის ტვინით მართვადი პროთეზის შექმნა ვცადეთ და ესეც არ გამოგვივიდა. დაახლოებით 1.5 წლის წინ ერთ-ერთ ტექნოლოგიურ ფესტივალში მივიღეთ მონაწილეობა, სადაც მთავარი კითხვა იყო "რითი გაერთობიან ადამიანები მომავალში". ჩვენც ვიფიქრეთ, რომ ფიზიკური ძალის შემდეგ აზროვნება ყველაზე მოთხოვნადი პროდუქტი გახდებოდა და მისი ვიზუალიზაცია ვცადეთ. ასე მივედით არსებული იდეამდე", — გვიყვება ერთ-ერთი დამფუძნებელი ზვიად ბიბლაშვილი, რომელიც მომავალი ექიმია.

ტვინისა და ტექნოლოგიის დაკავშირება მხოლოდ "სიხშირითაა" შესაძლებელი. მათი ტექნოლოგიაც სწორედ ასე გადასცემს ადამიანის ბრძანებას მოწყობილობას, რომელსაც 1 ფუნქციის შესრულება შეუძლია, მაგალითად: ნათურის ანთება, ან ტელევიზორის ჩართვა.

"საბოლოო ჯამში გვსურს ისეთი პროდუქტი შევქმნათ, რომელიც არაინვაზიური მეთოდით (ფიზიკური ოპერაციის ჩატარების გარეშე) იმუშავებს და მრავალფუნქციური იქნება. სამივე მათგანი ვმუშაობდით და პარალელურად ვსწავლობდით, ამიტომ პროცესი დროში გაიწელა. საქმის გაგრძელებისთვის გვჭირდებოდა ინვესტორი, რათა ჩვენი რესურსების 100% საკუთარი პროდუქტისთვის დაგვეთმო. ფაქტობრივად ყველა საგრანტო კონკურსზე მივიღეთ მონაწილეობა, თუმცა არავინ დაგვაფინანსა. არ დავნებდით და ბედი Shark Tank-შიც ვცადეთ", — ამბობს ზვიადი.

პროდუქტით განსაკუთრებით პავლე მგელაძე, Amazon-ის ხელოვნური ინტელექტის მართვის ერთ-ერთი გუნდის ხელმძღვანელი დაინტერესდა. თავდაპირველად 50,000 ლარის სანაცვლოდ 20%-იანი წილის შესთავაზეს ინვესტორებს. საბოლოო ჯამში იდეით ხუთივე Shark დაინტერესდა, თუმცა 50%-იანი წილი მოითხოვეს, იმ შემთხვევაში თუ პროექტის პირველი ეტაპი წარმატებით დასრულდებოდა, გუნდს დამატებით 50,000 ლარს გადასცემდნენ.

"მიუხედავად იმისა, რომ კომპანიის ნახევრის დათმობა არ შედიოდა ჩვენს გეგმებში, მაინც დავთანხმდით. ხუთივე Shark-ის ჩართულობა მხოლოდ ფინანსურ დახმარებას არ ნიშნავს, თითოეულ მათგანს მრავალმხრივი გამოცდილება აქვს, რომელიც პროდუქტის დახვეწაში დაგვჭირდება -იქნება ეს ხელოვნური ინტელექტი თუ იურიდიული კონსულტაცია", — აღნიშნავს ზვიადი.

მოზიდული თანხის დახმარებით, მომავალი 8-10 თვის განმავლობაში კომპანიის დამფუძნებლები დემო ვერსიის შექმნაზე იმუშავებენ. ამასობაში გუნდს მე-4 წევრიც შეემატა, რომელიც ფინანსურ მხარეს უხელმძღვანელებს და ბიზნესის განვითარების მიმართულებას ჩაიბარებს.

როგორც არ უნდა ჟღერდეს გუნდი, რომელიც ბაღის მეგობრებმა ჩამოაყალიბეს და გონებით მართვად მოწყობილობაზე მუშაობს ილონ მასკის Neuralink-ის კონკურენტია. ამ კომპანიის ღირებულება კი ბოლო მონაცემებით 2 მილიარდ დოლარს აჭარბებს. რამდენად შეძლებს ქართველებისგან შემდგარი გუნდი წარმატების მიღწევას გლობალურ ბაზარზე, ამას დრო გვიჩვენებს.