ჯანდაცვის სამინისტროს ინფორმაციით, წამახალისებელი ღონისძიების დაწყებამდე პერიოდთან შედარებით, დღის განმავლობაში ჩატარებული აცრების რაოდენობა 321%-თ გაიზარდა. სამინისტროს თქმით, 15-21 ნოემბრის პერიოდში, ჯამურად, 60 წელს გადაცილებული 15 217 მოქალაქე აიცრა, რაც წინა კვირის მაჩვენებელზე 38,00%-ით მეტია.

მათივე ინფორმაციით, იმუნიზაციის პროცესი განსაკუთრებით გააქტიურდა რეგიონებში. წამახალისებელი პროგრამის დანერგვამდე არსებულ პერიოდთან შედარებით, ბოლო 7 დღეში ვაქცინაციის მიმართვიანობა შიდა ქართლის რეგიონში 643,41%-ით გაიზრდა. ამავე რეგიონში, წინა კვირასთან მიმართებით, 50,08%-ით მეტი ადამიანი აიცრა. 543,79%-იანი ზრდა დაფიქსირდა გურიის რეგიონში, სადაც ამ პერიოდში 60 წელს ზემოთ ასაკის 985 მოქალაქე აიცრა. სამინისტროს ცნობით, აღნიშნული, წინა კვირასთან მიმართებით, 67,80%-ით მეტია.

რაც შეეხება საქართველოს სხვა რეგიონებს, უწყების განცხადებით, იმუნიზაციის პროცესში პენსიონერი მოქალაქეები მთელი ქვეყნის მასშტაბით უფრო აქტიურად ერთვებიან. მათი ინფორმაციით, წამახალისებელი პროგრამის ამოქმედებამდე არსებულ პერიოდთან შედარებით, გასული 7 დღის განმავლობაში 467,65%-ით მეტი აცრა ჩატარდა რაჭა-ლეჩხუმ-ქვემო სვანეთში. 405,88%-იანი ზრდა ფიქსირდება ქვემო ქართლში, ხოლო სამეგრელო-ზემო სვანეთში ეს მაჩვენებელი 401,99%-ს შეადგენს.

ფოტო: ჯანდაცვის სამინისტრო

8 ნოემბერს, პრემიერმინისტრმა ირაკლი ღარიბაშვილმა განაცხადა, რომ თითოეული პენსიონერი, რომელიც ვაქცინაციას პირველ იანვრამდე ჩაიტარებს, ერთჯერად 200-ლარიან საპენსიო დანამატს მიიღებს. ჯანდაცვის მინისტრის მოადგილემ, თამარ გაბუნიამ განმარტა, ეს პროგრამა შეეხება იმ პენსიონერებს, რომლებიც აქამდე არ აიცრნენ და ეს წახალისების მექანიზმია.

გაიგე მეტი: