პარლამენტმა ადგილობრივ თვითმმართველობის კოდექსში შესატანი ცვლილებები დაამტკიცა. მას მხარი 80-მა დეპუტატმა დაუჭირა, წინააღმდეგი იყო — 8. კანონპროექტი ეხება როგორც მოადგილეების ზრდას, ასევე, ფრაქციების რაოდენობის შემცირებას.

კანონპროექტის თანახმად, საკრებულოს ფრაქციის თავმჯდომარეს უნდა ჰყავდეს ერთი მოადგილე, ხოლო ყოველ 3 წევრზე შესაძლებლობა აქვს დაიმატოს კიდევ ერთი. აღსანიშნავია, რომ თავდაპირველ ვერსიაში დამატებითი მოადგილის ყოფნის უფლება თავმჯდომარეს ფრაქციის ყოველ 5 წევრზე ჰქონდა, თუმცა კანონპროექტის ერთ-ერთმა ავტორმა, სოზარ სუბარმა განაცხადა, რომ ნაციონალური მოძრაობის რეკომენდაციით ეს ნორმა 3-მდე შეამცირეს, ოღონდ იმ დათქმით, რომ ფრაქციის თავმჯდომარისთვის მოადგილეთა მაქსიმალური რაოდენობა იქნება 7. მოქმედი რედაქციით, ფრაქციის თავმჯდომარეს ჰყავს 1 მოადგილე, იმ შემთხვევაში კი, თუ ფრაქციის წევრთა რაოდენობა 9-ზე მეტია, შეუძლია ჰყავდეს 2 მოადგილე.

ამასთან, იცვლება საკრებულოებში ფრაქციების შექმნის წესიც. კონკრეტულად, ერთი პოლიტიკური პარტიის წარდგენით არჩეულ წევრებს მხოლოდ ერთი ფრაქციის შექმნის უფლება ექნებათ.

გუშინ საერთაშორისო გამჭვირვალობა — საქართველომ (TI) აღნიშნული კანონპროექტი გააკრიტიკა და პარლამენტს მოუწოდა, არ გაეზარდა საკრებულოების თავმჯდომარეების მოადგილეთა რაოდენობა, ასევე, ფრაქციის თავმჯდომარეებისთვის სავალდებულო გამხდარიყო ქონებრივი დეკლარაციების შევსება.

გაიგეთ მეტი: