ყოფილი პრეზიდენტის, მიხეილ სააკაშვილის ადვოკატი ნიკა გვარამია ამბობს, რომ ის ახლა კარგად არის, მის სიცოცხლეს საფრთხე არ ემუქრება.

"იყოჩაღეს ექიმებმა. განსაკუთრებით უნდა აღვნიშნო, ახლა შეიძლება გაგიკვირდეთ, ქალბატონი დემურიშვილი. პირდაპირი მნიშვნელობით, ამ ადამიანებსაც რატომ ზაფრავენ და მუდმივი სტრესის ქვეშ ამყოფებენ ექიმებსაც ვგულისხმობ, ჩემთვის გაუგებარია", — განაცხადა გვარამიამ ციხის საავადმყოფოდან გამოსვლის შემდეგ.

ნიკა გვარამიამ ასევე თქვა, რომ სააკაშვილი დილიდანვე ცუდად იყო და სიარულისას უფრო მეტად ცუდად გახდა.

ექსპრეზიდენტის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე", ამასთან მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია.

გუშინ 17 ნოემბერს სახალხო დამცველის მიერ შექმნილმა ექიმების ჯგუფი მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს მე-18 დაწესებულების კლინიკა არ აკმაყოფილებს.