საქართველოს პრემიერმინისტრმა, ირაკლი ღარიბაშვილმა ფრანგ მეწარმეთა გაერთიანების წევრებს საქართველოს საინვესტიციო შესაძლებლობები გააცნო. ინფორმაციას ამის შესახებ მთავრობის ადმინისტრაცია ავრცელებს.

ადმინისტრაციის ცნობით, მთავრობის მეთაურმა ხაზი გაუსვა საქართველოს უნიკალურ მდებარეობას, სტრატეგიულ ურთიერთობებსა და თავისუფალი ვაჭრობის შესახებ შეთანხმებებს ევროკავშირთან, დსთ-ის ქვეყნებთან, თურქეთთან, ჩინეთთან და აღნიშნა, რომ ეს უცხოელ ინვესტორებს მრავალმილიონიან ბაზრებზე თავისუფლად წვდომის საშუალებას აძლევს.

პრემიერმინისტრის შეფასებით, ფრანგ ბიზნესმენთა წარმომადგენლობითი დელეგაცია ადასტურებს საფრანგეთის დიდ ინტერესს ქართული ბაზრისადმი. ფრანგ მეწარმეთა გაერთიანების დელეგაციის შემადგენლობაში იმყოფებიან ინფრასტრუქტურის, მშენებლობის, საინჟინრო, სოფლის მეურნეობის, ენერგეტიკისა და სხვა სფეროებში მოღვაწე ბიზნესმენები, რომლებიც საქართველოში პოტენციურ საინვესტიციო პროექტებს სწავლობენ.

ადმინისტრაციის ცნობით, ვიზიტის ფარგლებში, დაგეგმილია ინვესტორთა სექტორული შეხვედრები სხვადასხვა უწყებებთან. მთავრობის ადმინისტრაციაში გამართულ შეხვედრას საფრანგეთის ელჩი საქართველოში დიეგო კოლასი, ვიცე-პრემიერი, გარემოს დაცვის და სოფლის მეურნეობის მინისტრი ლევან დავითაშვილი, ეკონომიკისა და მდგრადი განვითარების მინისტრი ნათია თურნავა და მთავრობის ადმინისტრაციის უფროსი ილია დარჩიაშვილი ესწრებოდნენ.

მთავრობის ადმინისტრაციის მიერ გავრცელებულ რელიზში ნათქვამია, რომ ღარიბაშვილმა ინვესტორებს საქართველოს მთავრობის მხრიდან მაქსიმალური მხარდაჭერა აღუთქვა.

უნდა აღინიშნოს, რომ ბოლო პერიოდში საქართველოში განხორციელებული პირდაპირი უცხოური ინვესტიციების (FDI) მოცულობა მნიშვნელოვნად არის შემცირებული. თუ გასული წლების ინვესტიციების მონაცემებს გადავხედადავთ, ვნახავთ, რომ 2019 წლის შემდეგ FDI-ის მოცულობა წლიურ ჭრილში მუდმივად კლებადია. ამ მხრივ კიდევ უფრო "გამორჩეული" იყო 2020 წელი, როდესაც საქართველოში შემოსული პირდაპირი უცხოური ინვესტიციების მოცულობა დრამატულად შემცირდა.

2020 წელს ქვეყანაში სულ 572 მილიონი დოლარის ინვესტიცია განხორციელდა. ეს მონაცემი 2019 წლის მაჩვენებელთან შედარებით 57,2%-ით არის შემცირებული. FDI-ს ამაზე დაბალი მაჩვენებელი ბოლოს 2005 წელს დაფიქსირდა, როდესაც ქვეყანაში 452,8 მილიონი დოლარის პირდაპირი უცხოური ინვესტიცია შემოვიდა.

მიმდინარე წლის პირველ ნახევარში საქართველოში შემოსულმა პირდაპირი უცხოური ინვესტიციების მოცულობამ 366,4 მილიონი დოლარი შეადგინა, რაც გასული წლის იმავე პერიოდის მონაცემზე 10,9%-ით ნაკლებია.

2021 წლის მეორე კვარტალში კი საქართველოში სულ 234,2 მილიონი დოლარის მოცულობის FDI შემოვიდა, რაც გასული წლის იმავე პერიოდის მონაცემზე 2,6%-ით ნაკლებია. ეს ნიშნავს იმას, რომ 2020 წლის მეორე კვარტალში, როდესაც ქვეყანაში უმძიმესი პანდემიური კრიზისი იდგა იმაზე მეტი პირდაპირი უცხოური ინვესტიცია განხორციელდა, ვიდრე მიმდინარე წლის შესაბამის პერიოდში.