საერთაშორისო გამჭვირვალობა - საქართველო მიიჩნევს, რომ საზოგადოებრივ მაუწყებელში თანამშრომლების დასაქმების გაუმჭვირვალე პოლიტიკაა. ამის შესახებ ორგანიზაციამ მოსაზრება დღეს, 31 დეკემებერს გაავრცელა.

ორგანიზაციაში აღნიშნავენ, რომ საზოგადოებრივ მაუწყებელში დასაქმების გაუმჭვირვალობა წლების განმავლობაში პრობლემა იყო და მენეჯმენტის შეცვლის მიუხედავად არ შეცვლილა. საერთაშორისო გამჭვირვალობაში ახალი მენეჯმენტის მხრიდან თანამშრომლების გაუმჭვირვალედ აყვანის საილუსტრაციოდ ტელეკომპანია GDS-დან კონკურსის გარეშე მიღებული კადრების მონაცემები მოჰყავთ. GDS-დან მაუწყებელზე მუშაობა გააგრძელეს, დირექტორის კონსულტანტებმა, ვებ-რედაქტორებმა, ჟურნალისტებმა და პროდიუსერებმა.

"მიუხედავად იმისა, რომ ცხადია, საზოგადოებრივი მაუწყებლის როგორც სამეურვეო საბჭოსთვის, ასევე მენეჯმენტისთვის პერიოდულად საკონსულტაციო მომსახურების საჭიროება, ბუნდოვანია, თუ რა საჭიროებებიდან გამომდინარე და რა დავალებების შესასრულებლად დასაქმდნენ მაუწყებელში დირექტორის მისვლიდან რამდენიმე დღეში კონსულტანტები/ექსპერტები/მრჩევლები, რომლებმაც შემდ გომ მუდმივ პოზიციებზე გადაინაცვლეს," - ვკითხულობთ საერთაშოროსო გამჭვირვალობა - საქართველოს მიერ გავრცელებულ მოსაზრებაში.

საერთაშორისო გამჭვირვალობა - საქართველოში ფიქრობენ, რომ საზოგადოებრივი მაუწყებლის მენეჯმენტმა უფრო აქტიურად უნდა იმუშაოს მაუწყებელში საშტატო განრიგის დამტკიცებაზე, რომელსაც უნდა დაეფუძნოს ახალ პოზიციებზე თანამშრომელთა მიღება, რომელთაც ღია კონკურსების მეშვეობით დაასაქმებენ.