ბოლნისის რაიონული სასამართლოს მოსამართლე, დევი დევიძე კიდევ ერთი მოსამართლეა, რომელიც საერთაშორისო პარტნიორებზე ადმინისტრაციული კომიტეტის განცხადებას ემიჯნება. დევიძის თქმით, საერთაშორისო პარტნიორები 30 წლის მანძილზე აფინანსებენ პროექტებს ქვეყანაში ინსტიტუტების, მათ შორის, მართლმსაჯულების გასაძლიერებლად და იმედს გამოთქვამს, რომ ისინი მხარდაჭერას კვლავ გააგრძელებენ.

"ფინანსური დახმარება არ არსებობს რჩევის, გამოცდილების გაზიარების, კეთილი სურვილების, შეცდომებზე მითითების და საღი კრიტიკის გარეშე. ამის გარეშე ყოველგვარი ფინანსური ინტერვენცია ჯანსაღ იდეას და ლოგიკას იქნება მოკლებული.

დარწმუნებული ვარ, მეგობარ ქვეყნებს სურთ იხილონ ძლიერი საქართველო ძლიერი სახელმწიფო ინსტიტუტებით, რათა დაიკავოს ღირსეულ ადგილს ევროპულ (ევროატლანტიკურ) ოჯახში. სხვაგვარად შეუძლებელიც არის, ეს ჩვენი ხალხის დეკლარირებული ნებაა", — წერს ის საკუთარ Facebook-ზე.

დევიძის თქმით, ელჩების "განცხადებების პათოსი" ორი ახალი მოსამართლის არჩევისას კონკურენტულობის ნაკლებობასთან დაკავშირებით გასაზიარებელია.

"ბუნებრივია, რომ დასავლეთი მოელის მათი დახმარების, მხარდაჭერის უკუგებას, რადგან გარდა კეთილი სურვილებისა, ეს მათი მხრიდან ანგარიშვალდებულების გამოვლინების ფორმაცაა თავიანთი გადასახადის გადამხდელების/ამომრჩევლების წინაშე", — აცხადებს მოსამართლე.

31 ოქტომბერს, არჩევნების მეორე დღეს იუსტიციის უმაღლესმა საბჭომ ორი ახალი მოსამართლე წევრი, პაატა სილაგაძე და გიორგი გოგინაშვილი აირჩია. ამ გადაწყვეტილებას კრიტიკა მოყვა, როგორც ადგილობრივ, ისე საერთაშორისო დონეზე.

კარლ ჰარცელმა განაცხადა, რომ ევროკავშირი კვლავ მზად არის მხარი დაუჭიროს საქართველოს, თუმცა დახმარება დამოკიდებული იქნება ძირითადი რეფორმების განხორციელებაზე. ევროკავშირის ელჩის თქმით, საბჭოს 2 წევრის არჩევა იყო ნაჩქარევი, გაუმჭვირვალე და არაკონკურენტული. მან ასევე აღნიშნა, რომ ეს იყო ბოლო 4 თვის განმავლობაში რიგით მე-5 უკან გადადგმული ნაბიჯი. აშშ-ის საელჩომაც განაცხადა, რომ ეს პროცესი არც კონკურენტული იყო და არც გამჭვირვალე. მათ ხაზი გაუსვეს, რომ შერჩევა მაშინ მოხდა, როდესაც ქვეყნის ყურადღება გადატანილი იყო მუნიციპალურ არჩევნებზე.

რაც შეეხება ადგილობრივ ორგანიზაციებს, საქართველოს დემოკრატიული ინიციატივის განცხადებით, ახალი წევრების არჩევა არის სასამართლოში არსებული ე.წ კლანის წარმატებული მცდელობა შეინარჩუნოს გავლენები. ახალგაზრდა იურისტთა ასოციაციაც ამბობს, რომ ეს კლანური მმართველობის მანიპულაციაა. დამოუკიდებელი იურისტების ჯგუფი კი აცხადებს, რომ მოსამართლეები ამჯერადაც მოწყვლადი აღმოჩნდნენ გავლენიანი ჯგუფის ნების წინააღმდეგ.

პასუხად მოსამართლეთა კონფერენციის ადმინისტრაციულმა კომიტეტმა განცხადება გაავრცელა, რომელშიც ამბობს, რომ შეფასებები გადაჭარბებული, დაუსაბუთებელი და წინააღმდეგობრივია და ეს გადაწყვეტილება ქვეყნის ევროინტეგრაციის პროცესს ვერანაირად დააზიანებს. მათივე აზრით, გაუგებარია, რატომ შეფასდა 31 ოქტომბერს კონფერენციის ჩატარება ნაჩქარევად, როდესაც ის საერთო სასამართლოების შესახებ საქართველოს ორგანული კანონის სრული დაცვით ჩაინიშნა. კომიტეტის განცხადებას უკვე 20-მდე მოსამართლე ემიჯნება.