ტელეკომპანია "იმედის" თანამშრომლის, შაკო ნათენაძის გარდაცვალების საქმეზე შსს-მ ერთი პირი დააკავა. ამის შესახებ ინფორმაცია ტვ იმედმა გაავრცელა. მათი ცნობით, ბრალდებული 7 მაისს დააკავეს. გამოძიება დაწყებულია სისხლის სამართლის კოდექსით 117-ე მუხლით, რაც ჯანმრთელობის განზრახ მძიმე დაზიანებას გულისხმობს.

შაკო ნათენაძე საავადმყოფოში თავის მძიმე ტრავმებით შეიყვანეს, სადაც შესაბამისი სამედიცინო დახმარება გაეწია. მისი ჯანმრთელობის მდგომარეობა დამძიმდა და 10 მაისს გარდაიცვალა.

აღსანიშნავია, რომ გუშინ ტელეკომპანია "იმედმა" აღნიშნული ინფორმაციის გაშუქებისას არ დააკონკრეტა, რა გახდა შაკო ნათენაძის გარდაცვალების მიზეზი, რასაც საზოგადოების კრიტიკა მოჰყვა. "იმედის" დილის ეთერის წამყვანის თქმით, "მან [შაკო ნათენაძემ] ვერ შეძლო დაეძლია ეს უდიდესი გამოწვევა".

დღეს, 14 მაისს "იმედის" დღის ეთერის წამყვანმა, ეკო ფანგანმა "იმედის" თანამშრომლების სახელით განცხადება გააკეთა, სადაც კოლეგის გარდაცვალების მიზეზებსა და დანაშაულში ბრალდებულის დაკავების შესახებ გაავრცელა ინფორმაცია. მისივე თქმით, "კატეგორიულად მიუღებელია ნებისმიერი სპეკულაცია ამ თემაზე. მიუღებელი და ამორალურია ამ უმძიმესი ტრაგედიის პოლიტიკური დღის წესრიგისთვის, ან "იმედზე" თავდასხმისთვის გამოყენება."