საია-ს ცნობით, 2024 წლის ნოემბრიდან 2025 წლის 18 მარტის ჩათვლით, გზის სპონტანურად გადაკეტვისთვის აქციის მონაწილეებზე გამოწერილი ჯარიმების ოდენობა 2 000 000 ლარს აღწევს.

ქართული ოცნების ხელისუფლებამ ადმინისტრაციულ სამართალდარღვევათა კოდექსის 174 მუხლში ცვლილებები შეიტანა, რის შედეგადაც დემონსტრაციების დროს გზის სპონტანურად გადაკეტვისთვის ჯარიმა 10-ჯერ, 500 ლარიდან 5000 ლარამდე გაიზარდა.

ამ მუხლით საქმის წარმოებისას პოლიცია იყენებს სახის ამომცნობ კამერებს. როგორც წესი, ასეთ საქმეებში ერთადერთ მტკიცებულებას სახის ამომცნობი კამერებიდან ამოღებული ფოტოები წარმოადგენს, რომლებიც, ძირითადად, შესაბამისი კონტექსტის იგნორირებით, პირის სამართალდამრღვევად მიჩნევისათვის სასამართლოს საკმარის მტკიცებულებად მიაჩნია.

"დეკემბერსა და თებერვალში დაჩქარებული წესით მიღებული საკანონმდებლო ცვლილებების შედეგად, გაიზარდა სამართალდარღვევებთან დაკავშირებით ყველაზე ხშირად გამოყენებულ ნორმათა სანქციები. აღსანიშნავია, რომ ადმინისტრაციული პატიმრობის მაქსიმალური ვადა გაოთხმაგდა და, 15-ის ნაცვლად, 60 დღე დადგინდა, საგრძნობლად გაიზარდა ჯარიმებიც — ზოგიერთი ათჯერაც. ჩვენს ხელთ არსებული მონაცემებით, დაკისრებული ჯარიმების ოდენობა 2 000 000 ლარს (დაახლოებით, 720 835 აშშ დოლარს) აღწევს", — წერია სამოქალაქო საზოგადოების ორგანიზაციების ანგარიშში.