ჯულიეტ ბინოში ამბობს, რომ ჟერარ დეპარდიე "მონსტრი არ არის", მიუხედავად იმისა, რომ ის სექსუალურ შევიწროებაში დამნაშავედ ცნეს.

ფრანგმა მსახიობმა ეს განცხადება კანის კინოფესტივალზე გააკეთა, სადაც წელს ჟიურის პრეზიდენტია — იმავე დღეს, როცა პარიზის სასამართლომ 76 წლის დეპარდიე ორ ქალზე სექსუალურ ძალადობაში დამნაშავედ ცნო. შემთხვევა 2021 წელს ფილმის Les Volets Verts (მწვანე ფარდები) გადაღებისას მოხდა. დაზარალებულები არიან 54 წლის დეკორატორი და 34 წლის ასისტენტ-რეჟისორი.

დეპარდიეს 18-თვიანი პირობითი სასჯელი მიესაჯა და 29,040 ევროს ჯარიმა დაეკისრა. ასევე, სასამართლოს გადაწყვეტილებით, დეპარდიე სქესობრივი დანაშაულების ეროვნულ ბაზაში დარეგისტრირდება. მსახიობი განაჩენის გამოცხადებას არ დასწრებია.

დეპარდიე ბრალდებებს არ აღიარებდა, მოსამართლე ტიერი დონარმა კი თქვა, რომ მსახიობის დასაბუთება არადამაჯერებელი იყო.

დეპარდიე სასამართლოში

დეპარდიე სასამართლოში

ფოტო: Stephanie Lecocq / Reuters

მიუხედავად განაჩენისა, ჟულიეტ ბინოში ფრთხილად მიუდგა დეპარდიეს "დემონიზაციას" და განაცხადა:

"ის ადამიანია, რომელმაც მომხდარი ფაქტების (რომელიც სასამართლომაც შეაფასა) გამო დაკარგა თავისი აურა. ჩემთვის ფილმის ვარსკვლავი მეფეა. მაგრამ წმინდა ის არის, რაც ხელოვნებაში იქმნება. ის ახლა წმინდა აღარ არის. ძალაუფლება სხვაგან გადავიდა".

ბინოშმა ასევე ილაპარაკა იმაზე, რომ როგორც დეპარდიე, ასევე სექსუალური ძალადობისთვის მსჯავრდებული ჰარვი ვაინშტაინი, ერთ დროს, კანის ფესტივალის პატივსაცემი სტუმრები იყვნენ.

"ფესტივალის ორგანიზატორები დღეს უკვე სხვანაირად აფასებენ სიტუაციას", — თქვა ბინოშმა — " მათ ესმით, რომ საჭიროა რეაგირება და მსხვერპლის მხარეზე დგომა. ეს მნიშვნელოვანი პერიოდია. #MeToo მოძრაობა საფრანგეთში უფრო გვიან მოვიდა, ვიდრე ამერიკაში, მაგრამ ახლა უკვე აქაც არის."

ჯულიეტ ბინოში

ჯულიეტ ბინოში

ფოტო: AP Photos

დეპარდიეს წინააღმდეგ აქამდე 20-ზე მეტი საჯარო ან ოფიციალური საჩივარი გაჟღერებულა სექსუალური შევიწროების შესახებ, თუმცა მათგან სასამართლომდე მხოლოდ ეს ორი საქმე მივიდა. ზოგი საქმე მტკიცებულებების სიმწირის ან ხანდაზმულობის ვადის გასვლის გამო ვერ გაგრძელდა.

ერთი დაზარალებული ქალი სასამართლოში აღწერდა, რომ დეპარდიემ ის ძალით მოაქცია ფეხებს შორის და ეხებოდა, თან სექსუალურ კომენტარებსაც აკეთებდა:

"ყველგან მემეხო, მათ შორის მკერდზეც" — ამბობდა ის — "შემეშინდა. ის კი იცინოდა."

ეს საქმე საფრანგეთში სექსუალური ძალადობის საკითხზე ეროვნული დონის განხილვის ნაწილი გახდა და ბევრისთვის მიჩნეულია, როგორც #MeToo მოძრაობის მნიშვნელოვანი გარდამტეხი მომენტი ქვეყანაში.

ასევე ნახეთ: