დღეს, 3 ნოემბერს სომხურ-ქართულენოვანი საინფორმაციო პლატფორმის, განძის პრეზენტაცია გაიმართა.

განძი თანასწორობის, სოლიდარობის, ურთიერთდახმარებისა და ტოლერანტობის პრინციპებზე დაფუძნებული ონლაინპლატფორმაა, რომლის მიზანიც საქართველოში მცხოვრები ადამიანების ამ იდეების ირგვლივ გაერთიანებაა.

ეს საინფორმაციო პლატფორმა არასამთავრობო ორგანიზაცია საფარისა და გაეროს მოსახლეობის ფონდის(UNFPA) პარტნიორობის ფარგლებში შეიქმნა.

საფარის პროექტების მენეჯერმა, ნათია გვრიტიშვილმა პრეზენტაციაზე განაცხადა, რომ პლატფორმის აუდიტორია არამხოლოდ ახალგაზრდები, არამედ ზოგადად, სომხურენოვანი ეთნიკურად სომეხი მოსახლეობაა, ვინაიდან დღემდე გამოწვევად რჩება ენობრივი ბარიერი.

"ჩვენი პლატფორმის მთავარი მიზანი არის, საქართველოს სომხურენოვან მოსახლეობას მიაწოდოს სომხურ ენაზე ისეთ მნიშვნელოვან საკითხებზე ინფორმაცია, როგორიცაა ქალთა უფლებები, ბავშვთა უფლებები, ზოგადად, ადამიანის უფლებები, გენდერული თანასწორობა და მასთან დაკავშირებულ საკითხებზე ვისაუბრებთ ამ პლატფორმებზე. ასევე, მნიშვნელოვანია, მივაწოდოთ ინფორმაცია ქალთა და ბავშვთა მიმართ არსებულ საზიანო პრაქტიკებზე, როგორიცაა გენდერული ნიშნით სქესის შერჩევა, ადრეული ქორწინება, იძულებით ქორწინება და სხვა, ვისაუბროთ რეპროდუქიულ ჯანმრთელობასა და რეპროდუქციულ უფლებებზე და გარდა ამისა, ვისაუბრებთ ყველა იმ საკითხზე, რომელიც მნიშვნელოვანი და საინტერესო იქნება სომეხი ახალგაზრდებისთვის და ეთნიკურად სომხური თემისთვის.

პლატფორმის აუდიტორია არაა მხოლოდ ახალგაზრდები, არის, ზოგადად, სომხურენოვანი ეთნიკურად სომეხი მოსახლეობა, რადგან, როგორც უკვე ისაუბრეს წინა გამომსვლელებმა დღემდე გამოწვევად რჩება ენობრივი ბარიერი და თანაბარი წვდომა არ აქვს ქვეყნის მოსახლეობას ძალიან მნიშვნელოვან ინფორმაციაზე", — ამბობს ნათია გვრიტიშვილი.

საფარის აღმასრულებელმა დირექტორმა, ბაია პატარაიამ განძის პრეზენტაციაზე თქვა, რომ რეგიონებიდან ხმა ყოველთვის ნაკლებად ისმის ენის ბარიერის გამო, ამიტომ მნიშვნელოვანია არსებობდეს ინფორმაცია მათ ენებზეც.

"ჩვენთვის ძალიან მნიშვნელოვანია, რა თქმა უნდა, ქალთა გაძლიერება და როდესაც ქალთა გაძლიერებაზე ვსაუბრობთ, ვგულისხმობთ ყველა ქალის გაძლიერებას მიუხედავად მათი ეთნიკური, რასობრივი, რელიგიური თუ სხვა ნიშნისა. ქალთა გაძლიერება შეუძლებელია თუ სომეხი ქალები არ გაძლიერდებიან ისევე, როგორც ქართველი ან აზერბაიჯანელი ქალები საქართველოში.

რეგიონებიდან ხმა ყოველთვის ნაკლებად ისმის. განსაკუთრებით იმის გათვალისწინებით, რომ სახელმწიფოში გვაქვს სახელმწიფო ენის არცოდნის სერიოზული პრობლემა, რაც ძალიან დიდი ბარიერია უმცირესობების ინტეგრაციისათვის. როდესაც არ არ იცი სახელმწიფო ენა, ადამიანი პრაქტიკულად ვერ იღებს ინფორმაციას სახელმწიფოში მიმდინარე მოვლენებზე, ის ვერ უერთდება ვერც აქტივიზმს, ვერც სამოქალაქო სექტორს, ზოგადად, ამიტომ ძალიან მნიშვნელოვანია, რომ ინფორმაცია არსებობდეს, მათ შორის, ეროვნული უმცირესობის ენებზეც", — განაცხადა მან.

როგორც პრეზენტაციაზე აღინიშნა, განძი ორივე ენაზე, სომხურადაც და ქართულადაც ერთი და იგივე მნიშვნელობისაა და პლატფორმისთვისაც ამიტომ შეირჩა ეს სახელი.