ქართული ოცნების თავმჯდომარის, ირაკლი კობახიძის თქმით, არ აქვთ ვალდებულება, რომ რაიმე საკონსტიტუციო ცვლილება მიიღონ.

"უმრავლესობა თუ არ იქნა, ბუნებრივია, საკონსტიტუციო ცვლილებას ვერ მივიღებთ. ეს არის და ეს, მაგრამ ეს არ არის აუცილებელი საკითხი ჩვენი ქვეყნის დემოკრატიული განვითარებისთვის, ამიტომ ეს მათი არჩევანია და მათი გადაწყვეტილებაა. რა თქმა უნდა, ჩვენ გავაგრძელებთ მსჯელობას ბარიერის დაწევაზე, ეს იქნება სამსჯელო თემა, მაგრამ რომ არ შეიცვალოს კონსტიტუციაში არაფერი, ამით დემოკრატიულ განვითარებას არავითარი ზიანი არ მიადგება, შეიძლება უკეთესიც კი იყო დემოკრატიული განვითარებისთვის იმიტომ, რომ პროპორციული სისტემა 5%-იანი ბარიერით არის აბსოლუტურად ლეგიტიმური და დემოკრატიული მოცემულობა.

არავითარი ვალდებულება ჩვენ არ გვაქვს, რომ რაიმე საკონსტიტუციო ცვლილება მივიღოთ. როდის, რა როგორ, ამაზე პარლამენტი მიიღებს გადაწყვეტილებას", — განაცხადა მან.

ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

ამის შემდეგ, რამდენიმე დეპუტატმა პარლამენტიდან გასვლის გადაწყვეტილება მიიღო. მათ შორის, ნაციონალური მოძრაობის წევრებმა, ნონა მამულაშვილმა და ანა წითლიძემ. პარლამენტს დატოვებს ლევან ვარშალომიძეც. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც. მანამდე, 31 ოქტომბერს გამართულ აქციაზე ლელოს ლიდერმა, მამუკა ხაზარაძემ მიიღო მანდატის დატოვების გადაწყვეტილება.